خلیل‌زاد جزییات دور نهم مذاکرات قطر را با رهبران حکومت شریک کرد
۸صبح، کابل: زلمی خلیل‌زاد، نماینده ویژه امریکا در امور صلح افغانستان، پس از پایان دور نهم مذاکرات صلح در دوحه، پایتخت قطر، به کابل آمده و با رهبران حکومت وحدت ملی دیدار کرده است.
براساس یک اعلامیه ارگ، آقای خلیل‌زاد چاشت امروز دوشنبه، یازدهم سنبله، با رهبران حکومت در ارگ ریاست جمهوری دیدار کرده است. هم‌زمان با این، خلیل‌زاد صبح امروز با عبدالله عبدالله، رییس اجرایی حکومت وحدت ملی به صورت جداگانه دیدار و گفت‌وگو کرده است. سپیدار گفته است که در این دیدار، آقای خلیل‌زاد، رییس اجرایی را در جریان آخرین جزییات گفت‌وگوهای صلح قرار داده و از تأمین صلح سراسری و پایدار اطمینان داده است. سپیدار تأکید کرده که خلیل زیاد در جریان سفرش به کابل با تمام طرف‌ها مذاکره و گفت‌وگو خواهد کرد.
ارگ و سپیدار در مورد جزییات تفصیلی که خلیل‌زاد با رهبران حکومت شریک کرده است، معلومات نداده‌اند.
