بدخشان سیندیزې فرعي حوزه کې ۵ هایدرولوژي دستګاوې نصب او ګټې اخیستنې ته وسپارل شوې
۸صبح، کابل: د اوبو چارو د تنظيم ملي ادارې لخوا په خپرې شوې خبرپاڼې کې راغلي، د بدخشان سیندیزې فرعي حوزه کې پنځه هایدرولوژي دستګاوې ولګول شوې او ګټې اخیستنې ته وسپارل شوې.
خبرپاڼه زياتوي، دغه دستګاوې د هایدرولوژي ارقامو او شمېرو را ټولولو، د موجوده اوبو اندازې او د اوبو وضعیت معلومولو په موخه په یاده حوزه کې ولګول شوې او ګټې اخيستنې ته وسپارل شوې.
د اوبو چارو ادراې د تنظيم ملي ادارې وياند، نظام خپلواک له ۸صبح سره په خبرو کې وويل، د دغو دستګاوو د لګلولو موخه د ځمکې لاندې اوبو د سطحې معلومول دي او په هغو ولايتونو کې لګول کېږي چې هلته د ځمکو لاندې اوبو کچه کمه وي.
ښاغلي خپلواک وويل، په دغو هایدروجیالوژيکي څاګانو کې ۳ څاګانې تاجيکستان هېواد سره په سرحد کې دي چې زموږ او د هغوی تر منځ د اوبو اندازه معلوموي. نوموړي همدا راز زياته کړه يادې دستګاوې د هېواد په ۹ ولايتونو کې لګول کېږي او کار يې دوام لري.
