۸صبح ننګرهار: په ننګرهار کې سیمه ییزې سرچینې وایي، په دغه ولایت کې یوه هلک خپل پلار د تبرګي په ګوزارونو وژلی دی.
سرچينې له ۸صبح ورځپاڼې سره په خبرو کې ويلي، چې دغه پېښه د وږي میاشتې په ۲۱مه د ننګرهار ولايت د دره نور ولسوالۍ په «وايګل» سيمه کې رامنځته شوې ده.
وژل شوی کس عالم نومیږي او زوی یې د تبرګي په ګوزارونو ټپي کړی و، خو د ډېرو ټپونو له امله یې په روغتون کې ساه ورکړې.
تر اوسه د دغه سړي د وژنې انګېزه نه ده معلومه او د پېښې عامل له سيمې په تېښته بريالى شوى دى.
طالبانو هم د دې پېښې پخلی کړی دی.
دا په داسې حال کې ده، چې د طالبانو له واکمنۍ وروسته په ننګرهار ولایت کې جنايي پېښې او کورنۍ تاوتریخوالی زیات شوی دی.
کارپوهان وايي، د بې وزلۍ او بېکارۍ خپرېدل هغه لاملونه دي چې د دا ډول پېښو د زیاتوالي لامل کېږي.
