۸صبح، کندهار: په کندهار کې ځايي سرچينې وايي، چې په دغه ولايت کې په يوې صنعتي فابريکې کې اور لګېدنې ستر مالي زيانونه اړولي دي.
سرچينې له ۸صبح ورځپاڼې سره په خبرو کې ویلي، چې دغه اور لګېدنه د چهارشنبې ورځ د (وږي میاشتې په ۲۹مه) د کندهار ښار په صنعتي ښارګوټي کې د جالۍ او مېوې ټوکرۍ په يوې تولیدي کارخونه کې رامنځته شوې ده.
د سرچينې د معلوماتو له مخې، د دې اور لګېدنې له امله د فابريکې خاوند ته شاوخوا دوه ميليونه او ۵ سوه زره امريکايي ډالره زيان اوښتى دى.
د دې اور لګېدنې لامل د برېښنا شارټي ښودل شوې.
سرچینې ادعا کوي، چې اور مړ کوونکې ډله په خپل ټاکلي وخت نه ده رسېدلې، ځکه یې ډېر دوام کړی.
خو د فابریکې مسوولان یې د بیا فعالولو په موخه د مالي همکارۍ غوښتونکي دي.
دا په داسې حال کې ده، چې تېر کال هم په کندهار کې لسګونه کارخونې د برېښنا د نشتوالي له امله تړل شوې وې.
د کندهار ولایت په صنعتي پارکونو کې د اوسپنې ویلي کولو، مشروباتو، د مالوچو پروسس، خوراکي توکو تولید او نورې فابریکې فعالیت لري.
