په ننګرهار کې يوه ښځه د خپل مېړه لخوا ووژل شوه
۸صبح، ننګرهار: د ننګرهار ځايي سرچینې وايي، په دغه ولایت کې یوه سړي خپله مېرمن وژلې ده.
دا پېښه د چهارشنبې په ورځ (د غوايي په ۲۷مه)، د ننګرهار ولایت د مومندرې ولسوالۍ، د (ګردي غوث) په کلي کې شوې ده.
يوه باوري ځايي سرچينه وايي، چې ددغې ښځې مېړه د هغې له وژلو وروسته، له سیمې پښې سپکې کړي او تښتېدلی دی.
ویل کیږي، چې له دغې ښځې د ۲ نجونو او ۳ هلکانو په ګډون، ۵ ماشومان پاتې دي.
د خپل مېړه له لوري د دغې ښځې د وژلو لامل کورنۍ ستونزې بلل شوې دي.
په ننګرهار ولايت کې طالبانو دغه پيښه تاييد کړې ده او د عامل کس د نيولو لپاره يې، د خپلو هڅو خبر ورکړی دی.
په وروستیو میاشتو کې په هېواد کې د ښځو پر وړاندې تاوتریخوالی زیات شوی دی.
شاوخوا دوه اوونۍ وړاندې په پکتیکا کې یوه سړي د خپلې مېرمنې سر غوڅ کړ.
ددې پېښې لامل هم کورنۍ ستونزې بلل شوې وې.
