په فاریاب کې یوه ځوانه ښځه په ډزو ووژل شوه
۸صبح، فاریاب: په فاریاب ولایت کې سیمه ییزې سرچینې وايي، یوه ۲۸ کلنه مېرمن په خپل کور کې په ډزو وژل شوې ده.
سرچینو ۸صبح ورځپاڼې ته ویلي، چې دا پېښه د شنبې په ورځ (د غبرګولي په ۲۷مه) د دغه ولایت د ګرزیوان ولسوالۍ په (دهندره) کلي کې رامنځته شوې ده.
تر اوسه معلومه نه ده چې په دغې میرمنې چا ډزې کړې دي.
دغه راز پرون ماښام هم د دغه ولايت په قيصار ولسوالۍ کې يوې حاملې ښځې د موږکانو د دوا په خوړلو ځان وژنه کړې ده.
د دغو دواړو پېښو لامل کورنۍ تاوتریخوالی بلل شوی.
په فاریاب کې سیمه ییزو طالب چارواکو تر اوسه په دې اړه څه نه دي ویلي.
د معلوماتو پر بنسټ په فارياب کې د ښځو د مرموزو وژنو او ځان وژنو پېښې زياتې شوې دي.
یوازې په تېرو دوو اونیو کې په دغه ولایت کې اوو ښځو ځان وژنه کړې او یا هم وژل شوي دي.
