۸صبح، کابل: د «تعلیم تر ټولو لوړ» نامه لاندې یوې نړۍوالې موسسې اعلان کړی چې افغانستان د هغو هېوادونو په نوملړ کې دی چې د زده کړو په برخه کې تر ټولو ناوړه شرایط لري.
دغه سازمان د جمعې په ورځ د وږي میاشتې په ۲۵مه د یو راپور په خپرولو سره ویلي، چې جنسیتي نابرابرۍ، زده کړو ته د نجونو محدود لاس رسی، پر ښوونځیو بریدونه، د زده کړو ګډوډي، د بې سوادۍ لوړه کچه او یو شمېر نورو ستونزو افغانستان له سختو ننګونو سره مخ کړی دی.
د (PEIC) د جګړې او ناامنۍ د پوهنې د ساتنې د پروګرام اجرایوي مشرې ملیحې ملک ویلي، چې دا ننګونې د«دولتي او غیر دولتي» لوبغاړو د مداخلو له امله زیاتې شوي او د هېواد بنسټیزو او تعلیمي فرصتونو ته یې د پام وړ ضربه رسولې ده.
د هغې په وينا، افغانستان په پرله پسې ډول د هغو هېوادونو په کتار کې دى، چې د پوهنې په برخه کې له پرله پسې ناکاميو سره مخ دي.
نوموړې څرګنده کړه: «په افغانستان کې پر پوهنې برید له ټولو خواوو څخه، د دولتي او غیر دولتي لوبغاړو له خوا شوی او دې کار په دوامداره توګه د پوهنې بهیر زیانمن کړی دی. په افغانستان کې پر زده کړو نوي بندیزونه لا هم ننګونکي دي.»
د يادونې وړ ده، چې طالبانو د هېواد تر بيا واک ته رسېدو وروسته د خپلې واکمنۍ د لومړۍ دورې په څېر د پوهنتونونو، منځنيو او لېسو دروازې د نجونو پر مخ تړلې دي.
د دې ډلې د چارواکو له پرله پسې ژمنو سره سره چې د پوهنتونونو او ښوونځیو د بیا پرانیستلو په اړه یې کوي، له دوو کلونو راهیسې نجونې له زده کړو بې برخې دي.
