چین له افغانستان سره د کورونا د ۴۰۰ زره دوزه واکسین مرسته کوي

په کابل کې د چین سفیر وانګ یو د کب په نهمه نېټه د عامې روغتیا وزارت له سرپرست وحید مجروح سره په کتنه کې له افغانستان سره د دغه هېواد له خوا د کورونا د ۲۰۰ زره نورو دوزه واکسینو د مرستې خبر ورکړی دی. په کابل کې د چین سفارت له دې مخکې اعلان کړی و چې له افغانستان سره ۲۰۰ زره دوزه د کورونا واکسینو مرسته کوي.
د عامې روغتیا وزارت ددې خبر په اعلان سره وېلي چې ددغه وزارت د غوښتنې له مخې، چین ۲۰۰ زره دوزه نور واکسین پر خپلې تېرې مرستې ورزیات کړي دي.
په دې توګه، له افغانستان سره د چین لخوا د کورونا د واکسین کچه ۴۰۰ زره دوزه ته رسېدلې ده.
وحید مجروح د چین له سفیر سره په کتنه کې د کورونا واکسین د دغه ویروس د خپرېدو په مخنیوي کې د روغتیا برخې یوه مهمه اړتیا بللې ده.
په دغه کتنه کې د عامې روغتیا وزارت سرپرست همداراز د جمهوریت روغتون د طبي دستګاوو د فعالولو لپاره د چین د همکارۍ غوښتنه کړې ده.
په هېواد کې د کورونا واکسین د تطبیق لړۍ د کب په پینځمه نېټه پيل شوه. دا بهیر د هند له خوا په ۵۰۰ زره دوزه مرسته شویو واکسینو سره پيل شوی دی. ټاکل شوې په لومړي پړاو کې روغتیايي کارکوونکي، امنیتي ځواکونه او خبریالان واکسین شي.