۸صبح، کابل: په سمنګان او هلمند ولایتونو کې د دوو جلا ترافیکي پېښو له امله لږ تر لږه اته کسان مړه شوي او ۲۳ نور ټپیان دي.
د طالبانو تر کنټرول لاندې باختر خبري اژانس شنبه د چنګاښ پر ۲۰مه، راپور ورکړی چې دا ترافیکي پېښې د سمنګان ولایت په حضرت سلطان ولسوالۍ او د هلمند ولایت په واشېر ولسوالۍ کې شوې دي.
د راپور له مخې، په سمنګان کې د دوو کرولا موټرو د ټکر له امله لږ تر لږه درې کسان مړه شوي او اووه نور ټپیان شوي دي.
په سمنګان کې ځايي طالب چارواکو ویلي، چې د دې پېښې اصلي لامل د موټرچلوونکو بېاحتیاطي وه.
په هلمند کې په یوه بله ترافیکي پېښه کې یو مسافر وړونکی موټر له یوه باروړونکي موټر سره ټکر کړی، چې له امله یې لږ تر لږه پنځه کسان مړه شوي او ۱۶ نور ټپیان شوي دي.
په هلمند کې ځايي طالب چارواکو ویلي، چې دا پېښه د هرات ـ کندهار پر لویه لار ه په واشير ولسوالۍ کې شوې ده.
ويل شوي چې د دې پېښې ټول مړه شوي کسان د مسافر وړونکي موټر سپرلۍ وې او د دوو ټپیانو روغتیايي وضعیت هم نازک ښودل شوی دی.
د سړکونو خرابوالی، د ترافیکي اصولو نه مراعتول او ډېر سرعت په هېواد کې د ترافیکي پېښو له مهمو لاملونو دي





