جرمني مرسته کوونکو له افغانستان سره د لا زیاتو مرستو غوښتنه وکړه
۸صبح، کابل: د جرمني د غیردولتی موسسو ټولنه (VENRO)، چې د بشري مرستو او پراختیایی پالیسیو په برخه کې کار کوي د دغه هېواد له حکومته غوښتي، چې له اړمنو افغانانو سره خپلې مرستې زیاتې کړي.
نړيوالو رسنيو پنجشنبه د لیندۍ پر ۲۴ د جرمني په پلازمېنه برلين کې د دې ټولنې د مشر ماټيس موګي له قوله خبر ورکړى، چې ښايي د روان کال په ژمي کې په افغانستان کې بشري ناورين نور هم سخت شي.
موګي، چې د جرمني د «نړۍ له لوږې سره د مرستې» سازمان عمومي منشي هم دی زیاته کړې یې ده: «جرمني باید خپلې بشري مرستې پراخې کړي او د لومړنیو طبي او روزنیزو خدمتونو په برخه کې هڅې وکړي.»
هغه ټینګار وکړ، چې دغو مرستو ته د ښځو او نجونو لاسرسی باید د یوه شرط په توګه وټاکل شي.
د یادولو وړ ده، چې په افغانستان کې د طالبانو په راتګ سره په هېواد کې د بېوزلۍ ګراف لوړ شوی دی.
مرستندویه سازمانونو او د نړۍ هېوادونو تل په هېواد کې د ناوړه بشري وضعیت په اړه خبرداری ورکړی دی.
