۸صبح، کابل: د بشري حقونو د څار اداره وایي، په افغانستان کې ښځې او نجونې زدهکړو ته د نه لاسرسي څخه نیولې تر «څارنې او ځورونې» سره مخ دي.
دغه بنسټ د دوشنبې ورځ، د لړم میاشتې په ۲۹مه پر اېکس ټولنیزه پاڼه کې لیکلي چې په افغانستان کې میلیونونه نجونې او ښځې له خپلو حقونو بې برخې دي.
د بشري حقونو د څار ادارې ټینګار کړی چې د افغان ښځو د «جنسي ځورونې» په اړه طالب مشران باید حساب او ځواب ورکري.
د يادونې وړ ده چې طالبانو د خپلې واکمنۍ د پیل راهيسې تر هرڅه ډېر د هېواد پر ښځو د بنديزونو په اړه سپارښتنې او فرمانونه صادر کړي دي.
دغو فرمانونو په افغانستان کې د ښځو اساسي حقونه تر پښو لاندې کړي او له عامه ډګر څخه يې لرې کړي دي.
که څه هم دغه بندیزونه په تېرو دوو کلونو کې له سختو نړۍوالو غبرګونونو سره مخ شوي، خو طالبانو ملګري ملتونه او لوېدیځ بنسټونه د دوی پر ضد په «پروپاګند» تورن کړي او وايي چې په افغانستان کې «اسلامي قوانین» پلي کوي او هر ډول مخالفت یې د اسلام پر ضد ګڼل کېږي.
