په فلپين کې د سېلاب او ځمکې د ښوېيدو په پېښه کې؛ ۴۴ تنه مړه او ۲۸ نور بې درکه شوي دي
د فلپین د طبیعي پېښو ملي آژانس اعلان کړی چې په دغه هېواد کې د سختو ورښتونو او سېلابونو له امله، لږ ترلږه ۴۴ تنه مړه شوي دي.
رویټرز خبري آژانس جمعه د دسمبر په دېرشمه د فلپین د طبیعي پېښو د ملي آژانس له قوله دا شمېرې خپرې کړې او ویلي یې دي چې د کرسمس په ورځ د ویسایاس او میندانایو سیمو په ښارونو، لویو لارو او کلیو کې د سختو ورښتونو او سېلابونو له امله کابو ۵۰ زره تنه د خپلو کورونو پرېښودلو ته اړ شوي دي.
د ورکړل شویو مالوماتو له مخې، په تېرو څلورو ورځو کې ددغو طبیعي پېښو له امله لږترلږه ۲۸ تنه بې درکه شوي دي.
نوموړي آژانس ددغو پېښو له امله د مالي زیانونو کچه ۲۴،۴ میلیون ډالره اټکل کړی دی.
د بې درکه شویو کسانو د ژغورنې لپاره هڅې روانې دي.
په فلپین کې د موسمي بارانونو او سېلابونو له امله هر کال زیات شمېر خلک قرباني کېږي.
