د اسرائیلو د دفاع وزیر یواو ګالانټ پر ایران تور ولګاوه چې د لبنان په سویل کې پر دغه هېواد د احتمالي برید لپاره «هوایی ډګر» جوړوي.
د رویټرز خبري اژانس د راپور له مخې ګالنټ دغه څرګندونې د دوشنبې په ورځ د سپټمبر په ۱۲مه د اسرائیلو په رایخمن پوهنتون کې کړې دي.
هغه د سیمې د انځورونو په ښودلو سره چې په وینا یې د لبنان په سویل کې د ایرانیانو له لوري جوړ شوی هوايي ډګر دی او د دغه هوايي ډګر د جوړولو موخه د اسرائیلو پر وړاندې «ترهګریز بریدونه» ګڼلي دي.
د ګالنټ په وینا، دغه هوایي ډګر کولای شي د منځنۍ کچه الوتکې ځای په ځای کړي.
هغه ځای چې د نوموړي په خبره ایران په کې هوايي ډګر جوړ کړی، د قلعه الجبور د سیمې او د جیزین ښار تر منځ په واټن کې موقعیت لري.
د لبنان دغه سیمه د اسرائیلو د سرحدي ښار مطولای شمال لوري ته په شل کیلومترۍ کې پرته ده.
ګالنټ زیاته کړې چې د دغه هوايي ډګر ځمکه د لبنان ملکیت دی، خو کنټرول یې د ایران په لاس کې دی، څو اسرائیل هدف وګرځوي.
د اسرائیلو د دفاع وزیر زیاته کړه: «که دا د جګړې لامل شي، موږ به د اسرائیلي پوځ له کارولو څخه ډډه ونه کړو.»
هغه خبرداری ورکړی، چې په دې صورت کې به حزب الله او لبنان «درانه او دردناک قیمت ورکړي.»
ایران تر اوسه د دغو ادعاوو په اړه غبرګون نه دی ښودلی.
په تیرو کلونو کې، اسرائیلي چارواکو د سپاه پاسداران قدس ځواک د سوریې له لارې په لبنان کې حزب الله ته د وسلو په لیږد تورن کړی دی.
