د مقاومت جبهه: د ملګروملتونو سازمان له ترټولو ترهګریز رژیم څخه د امنیت د تامین غوښتنه کړې

۸صبح، کابل: د افغانستان په اړه د ملګروملتونو سازمان د پرېکړه‌لیک له تصویب وروسته د مقاومت جبهې د دغه پرېکړه‌لیک پروړاندې غبرګون ښودلی دی.

د احمد مسعود په مشرۍ د مقاومت جبهې شنبه د لړم پر ۲۱ د یوې اعلامیې په خپرولو ویلي، چې د ملګروملتونو سازمان په افغانستان کې له ترټولو ترهګریز واکمن رژیم څخه غوښتي ترڅو د دغه هېواد د وګړو امنیت ټینګ کړي.

دغې جبهې د طالبانو له خوا د بشري حقونو د رعایت او نشه‌یي توکو د سوداګرۍ د درېدو په تړاو د ملګروملتونو سازمان غوښتنو ته په اشارې ویلي: «د طالبانو د عاید ترټولو غوره لار د نشه یي توکو کرنه، تولید او بازار ده.»

د مقاومت جبهې په وینا هغه پېښې چې افغانستان کې د طالبانو تر واکمنۍ لاندې شوې دي امنیت، اقتصاد او له نشه‌یي توکو او د ترهګرۍ له پراختیا سره د مبارزې په برخو کې د دې ډلې د بې‌وسۍ ښکارندویي کوي.

د ویلو ده، چې د ملګروملتونو سازمان افغانستان کې د طالبانو له واکمنۍ ۱۵ میاشتې وروسته تېره ورځ خپل لومړی پرېکړه‌لیک لاسلیک کړ. په دغه پرېکړه‌لیک کې راغلي، چې افغانستان پر یوه «خطرناک» هېواد بدل شوی دی.

ورته لیکنې

Back to top button