سیګار: د افغانستان بانکي سیسټم فلج شوی او مرکزي بانک له کاره لوېدلی
۸صبح، کابل: د افغانستان بیارغونې لپاره د امریکا ځانګړې پلټونکي یا سیګار وايي، چې افغانستان کې د بانکولۍ سیسټم فلج شوی او د دغه هېواد مرکزي بانک له کاره لوېدلی دی.
سیګار په خپله ټویټرپاڼه کې لیکلي، چې د نړیوالو بانکونو نه ملاتړ د دې لامل شوی، چې هېڅ بانک افغانستان کې کوچینو شخصي شرکتونو ته باور ورنه کړي.
د سیګار دغه څرګندونې چې د امریکا حکومت ته د افغانستان د اقتصادي وضعیت په اړه د دغه بنسټ د مفصل راپور یوه برخه ده، په افغانستان کې د نقدو پیسو نشتوالی لویه اقتصادي ننګونه یاده کړې ده.
د سیګار په دغه راپور کې د امریکا حکومت ته وړاندیز شوی، چې یوازې د افغانستان بانکونو ته د نقدو پيسو په تزریق بسنه ونه کړي او باید د بانکونو د فعالیت ملاتړ وشي.
د سیګار د راپور پر بنسټ، د پیسو تزریق له اقتصادي ودې سره مرسته نه ده کړې او اړتیا ده، چې د افغانستان بانکونو ته قرضه ورکړل شي؛ تر څو اقتصادي تحرک رامنځته شي.
په دې وروستیو کې امریکايي چارواکو منلې، چې له طالب چارواکو سره یې په امریکايي بانکونو کې د افغانستان د کنګل شویو پیسو د یوې برخې پر سپارلو خبرې اترې کړې دي.
د راپورنو له مخې، طالب چارواکو د دغو پیسو د سپارلو پر څرنګوالي سلا نه ده کړې او غوښتنه یې کړې، چې دا پیسې دې له قید و شرط پرته ور وسپارل شي؛ خو امریکايي چارواکو ټينګار کړی، چې دا پیسې دې یوه اماني صندوق ته وسپارل شي او طالبان دې ورته لاسرسی ونه لري.
