د طالبانو له خوا د نجونو د زدهکړو ممنوعیت؛ د کابل پوهنتون یوه استاد استعفا ورکړه
۸صبح، کابل: د کابل پوهنتون یوه استاد د طالبانو د مشر له خوا له زدهکړو د نجونو د منع کولو فرمان د صادرېدو په اعتراض په دغه پوهنتون کې د تدریس له دوام څخه ډډه کړې ده.
د کابل پوهنتون دغه استاد چې عبیدالله وردګ نومېږي په دې پوهنتون کې د ریاضیاتو استاد و. هغه چهارشنبه د لیندۍ پر دېرشمه د یوه پیغام په خپرولو د خپلې استعفا خبر ورکړی دی.
وردګ په دې پیغام کې ویلي، چې د طالبانو رژیم د اسلام د پیغمبر د لارښوونو او د افغانستان د خلکو د غوښتنو خلاف له زدهکړو د نجونو د منع کولو فرمان صادر کړی دی؛ له همدې امله نور نه غواړي د دغه رژیم په موجودیت کې د کابل په پوهنتون کې تدریس وکړي.
هغه ویلي، چې ښایي د ده استعفا د طالبانو لپاره کوم ارزښت ونه لري، خو د خپل وجدان د ارامۍ لپاره یې د کابل په پوهنتون کې له تدریس څخه لاس اخیستی دی.
د طالبانو غایب مشر ملا هبتالله اخوندزاده پر افغانستان له یو نیم کال واکمنۍ وروسته په یوه فرمان کې نجونې پوهنتونونو ته له تلو منع کړې دي.
