طالبانو په فراه کې د یوه بوډا سړي سر پرې کړ او د هغه څاروي یې يوړل
۸صبح، فراه: په فراه ولایت کې ځایی سرچینې وایي، چې طالبانو په دغه ولایت کې یو بوډا سړی په «وحشیانه» ډول وژلی دی.
ځايي سرچینې ۸صبح ورځپاڼې ته وايي، چې سه شنبه شپه د مرغومې پر۲۰ طالبانو د فراه ولایت د مرکز اړوند په دارآباد سیمه کې د یوه عمر خوړلي کس سر غوڅ کړی او بيا يې په مرميو ويشتلی دی.
د ځايي اوسېدونکو په وينا، تېره شپه طالبان له يوه رېنجر ډوله موټر سره يوه باغ ته ننوتل او وروسته د څو ډزو غږونه واورېدل شول.
هغوی زیاتوي، چې طالبان له څه مودې وروسته له سيمې ولاړل او د دغه عمر خوړلي سړي د «لاندي» ۷ پسونه، چې د پلورلو لپاره يې چمتو کړي وو، له ځان سره يوړل.
وژل شوي کس علي احمد نوميږي.
په فراه ولايت کې د طالبانو ځايي مسوولانو د دغې پيښې په تړاو څه نه دي ويلي.
د يادونې وړ ده، چې په دې وروستيو کې د هېواد په بېلابېلو ولايتونو کې د مرموزو وژنو پېښې زياتې شوې چې د خلکو اندېښنې يې راپارولي دي.
