طالبانو په غور کې يو پخوانى جهادي قوماندان نيولى
۸صبح، غور: په غور کې ځایی سرچینې وایي، چې د طالبانو استخباراتي ځواکونو د دغه ولایت د تیورې ولسوالۍ په «دهن یخن» په کلی کې یو پخوانی جهادی قوماندان نیولی دی.
سرچینې زیاتوي، چې د دغه پخواني جهادي قوماندان نوم دین محمد دی او پنجشنبې په سهار د لیندۍ په درېمه د طالبانو له لوري نیول شوی او نامعلوم ځای ته لېږدول شوی دی.
د سرچينو د معلوماتو له مخې، قوماندان دين محمد په تېر حکومت کې هېڅ پوځي او ملکي دنده نه لرله، خو د طالبانو حکومت په تېره دوره کې د دې ډلې له مخالفو جهادي قوماندانانو څخه و.
د غور سیمه ییزو چارواکو تر اوسه په دې اړه څه نه دي ویلي.
د يادونې وړ ده، چې شاوخوا پنځه مياشتې مخکې طالبانو د غور په تيورې ولسوالۍ کې د ولسي پاڅون پخوانى قوماندان محمد عثمان ملکزاده له خپل وراره سره نيولى و.
