۸صبح، بامیان: معتبرو ځایي سرچینو ۸صبح ورځپاڼې ته ویلي چې د بامیان په ورس کې د طالبانو ولسوال سیدغفور هاشمي، د ۱۲۲ بې وزله او اړمنو کورنیو د مرستې کارتونه حیف و میل کړي دي.
دوې سرچینې چې نه غواړي نوم یې واخیستل شي، جمعه د لیندۍ په ۲۵مه ۸صبح ورځپاڼې ته وايي چې د ورس ولسوالۍ کابو اوو پراختیايي شوراګانو او یو شمېر قومي مشرانو د بامیان ولایت لپاره د طالبانو د والي ملاعبدالله سرحدي دفتر ته شکایت لیک لېږلی دی.
دغه دوې سرچینې زیاتوي چې خلکو د سیدغفور هاشمي له خوا د بشردوستانه مرستو د حیل و میل په اړه ملاعبدالله سرحدي ته شکایت کړی او دغې ستونزې ته یې د پاملرنې غوښته کړې ده.
د سرچینو په وینا، تراوسه د ملاعبدالله سرحدي دفتر په دې هکله خلکو ته هېڅ ځواب نه دی ورکړی.
یوې سرچینې، د ورس ولسوالۍ د پراختیايي شوراګانو د مشرانو او مخورو د شکایت لیک متن ۸صبح ورځپاڼې ته رالېږلی چې ترې څرګندېږی په دې ولسوالۍ کې د طالبان ولسوال د «ابرار»، «CRS» او«GC_SS_O» په شان مرستندویه موسسو څخه ۴۰، ۴۷ او ۳۵ د بشري مرستو کارتونه ترلاسه کړي دي.
سرچینه زیاتوي: «د بامیان په ورس کې د طالبانو د ورس د ولسوال سید غفورهاشمي له خوا د بشردوستانه مرستو پر حیف ومیل سربېره، نوموړي خپل خپل ۱۶ تنه خپلوان او دوستان هم ددې ولسوالۍ په مهمو برخو کې د امنیه قوماندان، کرنې مدیر، د نفوسو د احوال د ثبت او… په توګه ګمارلي چې دا چاره په ورس کې د اختلافاتو لامل شوې ده.»
موږ غوښتل چې په دې هکله د بامیان په ورس کې د طالب ولسوال سیدغفور هاشمي او په دې ولایت کې د طالبانو د ځایي چارواکو نظر هم ترلاسه کړو؛ خو له پراخو هڅو سره سره بریالي نه شوو.
د یادولو وړ ده چې له دې مخکې هم د بامیان ولایت اوسېدونکو په دې ولایت کې د طالبانو د ځینو ځایي مسوولینو له خوا د بشردوستانه مرستو له حیف ومیل څخه شکایت کړی و.
