طالبانو په پنجشېر کې د واده له مراسمو څلور ملکي وګړي نیولي دي
۸صبح، پنجشېر: له پنجشېر څخه سیمهییزې سرچینې وایی، چې طالبانو په دغه ولایت کې د واده له مراسمو څلور ملکي وګړي نیولي دي او نامعلومه ځای ته یې لېږدولي دي.
سرچینې جمعه د لیندۍ پر ۱۱ ناوخته ۸صبح ورځپاڼې ته وايي، چې طالبانو دغه کسان د چهارشنبې په شپه داسې مهال، چې د درې ولسوالۍ په عبداللهخېل سیمه کې د خپلوانو د واده پر مراسمو بوخت وو نیول شوي دي.
دغه کسان د شمعون، صدامحسین، شیرعالم او میراکبر په نومونو یاد شوي دي.
د سرچینو په وینا طالبانو د دغو کسانو په نیولو سره د سیمې د اوسېدونکو د واده مراسم ګډوډ کړي دي.
طالبانو تر اوسه په دې اړه څه نه دي ویلي او د دغو کسانو د نیولو لامل هم نه دی روښانه.
له دې مخکې هم طالبانو په پنجشېر کې لسګونه ملکي وګړي نیولي، شکنجه او په ځینو مواردو کې یې وژلي دي.
