طالبانو د پنجشېر په عنابه او رخه کې درې مخکیني پوځیان نیولي دي
۸صبح، پنجشېر: پنجشېر کې سیمهییزې سرچینې وایي، چې طالبانو په دغه ولایت کې د مخکیني حکومت درې تنه پوځیان نیولي او یوه نامعلومه ځای ته یې لېږدولي دي.
سرچینې جمعه د لیندۍ پر پنځهويشتمه نېټه ۸صبح ورځپاڼې ته وایي، چې طالبانو دغه کسان پنځه ورځې مخکې د پنجشېر د عنابې او رخې ولسواليو له پاچنار او قلعهچه کلیو له مقاومت جبهې سره د همکارۍ په تور نیولي او تر اوسه د برخلیک په اړه معلومات نشته.
سرچینې د نیول شویو کسانو نومونه مجتبی، نوریق او بابولا یادوي او وایي، چې هغوی د مخکیني حکومت د پوځ افسران وو.
طالبانو تراوسه په دې اړه څه نه دي ویلي.
طالبانو له څو ورځو راهیسې د پنجشېر په بېلابېلو سیمو کې د ملکي وګړو د نیولو بهیر بیا پيل کړی دی.
د خپرو شویو راپورونو له مخې طالبانو په تېرو څو ورځو کې په دغه ولایت کې لږترلږه ۱۵ ملکیان نیولي او له ځان سره یې بېولي دي.
