۸صبح، کابل: په کابل کې د ترکیې سفیر جنک اونال د طالبانو د دفاع له سرپرست وزیر مولوي محمد یعقوب مجاهد سره د دوه «اړخیزو اړیکو او سیمه ییزو تحولاتو» په اړه خبرې کړي دي.
په کابل کې د ترکیې سفارت پر اېکس ټولنیزه پاڼه لیکلي چې دا لیدنه د سېشنبې ورځ، د لړم میاشتې په ۲۳مه په کابل کې ترسره شوې.
یاد سفارت دا ناسته ګټوره بللې او ویلي یې دي چې په دې ناسته کې پر دوه اړخیزو اړیکو او سیمهییزو تحولاتو خبرې وشوې.
که څه هم انقره د نورو ډېرو هېوادونو په څېر د طالبانو رژیم په رسمیت نه پېژني، خو له دې ډلې سره نږدې اړیکې لري.
له بلې خوا ترکیې ته د طالب چارواکو سفرونه په دې وروستیو کې زیات شوي دي.
د خپرو شویو راپورونو پر بنسټ، په وروستیو میاشتو کې د افغانستان د مرکزي بانک مشر ملا هدایت الله بدري، د رئیسالوزا اقتصادي مرستیال ملا عبدالغني برادر او د طالبانو د بهرنیو چارو سرپرست وزیر امیرخان متقي ترکیې ته سفرونه او د دغه هېواد له چارواکو سره یې خبرې کړي دي.
