په پروان او نيمروز کې په دوو جلا پېښو کې دوه تنه وژل شوي دي
۸صبح، پروان: د پروان ولایت سیمه ییزو سرچینو خبر ورکړی، چې په دغه ولایت کې یو ۲۸ کلن ځوان د ناپېژاندو وسله والو له خوا وژل شوی دی.
دغه پېښه نن دوشنبه )وري ۱۴) د دغه ولايت د جبل السراج ولسوالۍ د ميانه ګذر په کلي کې رامنځته شوې ده.
دغه ځوان عصمت نومېده او د ناپېژاندو وسله والو له خوا په چړو وهل شوی دی.
د طالبانو ځايي چارواکو هم د دې پېښې پخلی کړی دی.
تر اوسه د دې پېښې انګېزه نه ده څرګنده.
په نيمروز ولايت کې هم سيمه ييزې سرچينې وايي چې په دغه ولايت کې يو تن د ناپېژاندو وسله والو له خوا وژل شوى دى.
د دوشنبې په ورځ (وري ۱۴)، یوې سرچینې ۸صبح ورځپاڼې ته وویل، چې نامعلومو وسله والو د دغه ولایت په مرکز زرنج ښار کې یو سړی په ډزو وژلی او له سیمې تښتېدلې دي.
تر اوسه د دې پېښې لامل او انګیزه نه ده معلومه.
وسله والو طالبانو په دې اړه څه نه دي ویلي.
دا په داسې حال کې ده، چې په دې وروستيو کې د هېواد په يو شمېر ولايتونو کې مرموزې او هدفي وژنې زياتې شوې دي.
په وروستۍ پېښه کې د جمعې په ورځ (وري۱۱) نا معلومو کسانو په کاپیسا کې یو ماشوم وژلی او جسد یې سوځولی و.
