نامعلومو کسانو د جوزجان د آقچه د حج او اوقافو مدير وژلی دی
۸صبح، جوزجان: په جوزجان کې سیمه ییزې سرچینې وایي چې د دغه ولایت د اقچې ولسوالۍ د حج او اوقافو مدیر د نامعلومو کسانو له خوا وژل شوی دی.
ځايي سرچينې له ۸صبح ورځپاڼې سره په خبرو کې ويلي، چې دغه پېښه نن سهار د (کب۲۸) د اقچې ولسوالۍ د (خرابات کوڅې) په سيمه کې رامنځته شوې ده.
د آقچې د حج او اوقافو مدير مولوي (عبادالله)، د ناپېژاندو کسانو له خوا د چاقو په ګزارونو سره وژل شوى دى.
تر اوسه د مولوي عبادالله د وژنې لامل نه دی معلوم .
تر دې دمه کومې ډلې ددې پېښې مسوولیت نه دی منلی.
په جوزجان کې طالبانو د دغې پېښې پخلی کړی دی؛ خو دوی په دې اړه نور جزیات نه دي ورکړي.
څه موده وړاندې په فاریاب ولایت کې، د طالبانو د اقتصاد رئیس مولوي (عبدالرحمن منصور) هم نامعلومو وسله والو ترور کړ.
