غزني کې د غازي امان الله خان ماڼۍ کارونه په بشپړېدو دي
محمد عزيز پردېس
د غزني ولایت مقر ولسوالۍ کې د غازي امان الله خان ماڼۍ د بیارغولو چارې بشپړې شوي او ډېر ژر به ګټې اخیستنې ته وسپارل شي.
ياده ماڼۍ د ملي پراختیا شرکت له لوري رغول کیږي چې مالي لګښت یې د جمهوري ریاست عملیاتي ادارې له خوا ورکول کیږي.
د غازي امان الله خان ماڼۍ د اماني دورې له ماڼیو ده چې د تېرو جګړو پر مهال ویجاړه شوې وه او اوس يې د بیارغونې کارونه د بشپړېدو په حال کې دي چې ډېر ژر به ګټې اخیستنې ته وسپارل شي.
تاریخ پوهان وايي د دې ماڼۍ د بنسټ ډبره په ۱۳۰۵ لېږديز لمريز کال کې ايښودل شوې او د د رغولو چارې یې د غازي امان الله خان په ځانګړي سپارښتنه او لارښوونه د وخت د نوموتو معمارانو له خوا سرته رسېدلي دي.
دغه ماڼۍ غازي امان الله خان د خپلې واکمنۍ په وخت کې جوړه کړې وه او کندهار ته د تګ راتګ پر مهال يې دې ماڼۍ کې دمه کوله او هلته به يې د خلکو ستونزې له نږدې څخه اورېدلې.
