د نيويارک ښاروال زهران ممداني ويلي چې د هغه اداره د اسراييلو د لومړي وزير بنيامين نتنياهو د نيولو قانوني صلاحيت نه لري.
ممداني سه شنبه د جولای پر ۲۱مه، وويل چې د نتنياهو پر ضد د نړيوالې جزايي محکمې د نيولو له حکمه ملاتړ کوي، خو د نيويارک ښاروالۍ اداره د دغه حکم د عملي کولو قانوني واک نه لري.
هغه زياته کړه چې د امريکا فدرالي حکومت دا صلاحيت لري او له دغه حکومته يې وغوښتل چې د نړيوالې جزايي محکمې غړيتوب ترلاسه کړي او د نتنياهو د نيولو حکم عملي کړي.
ټاکل شوې ده چې نتنياهو په سپټمبر مياشت کې د ملګرو ملتونو د عمومي اسامبلې په غونډه کې د ګډون لپاره نيويارک ته سفر وکړي.
ممداني تېره اوونۍ ويلي وو چې د دغه سفر پر مهال د نتنياهو د نيولو قانوني امکان ارزوي؛ هغه ژمنه چې نوموړي تېر کال د نيويارک ښاروالۍ د ټاکنيز کمپاين پر مهال کړې وه.






