دیدار هیأت طالبان از قونسلگری افغانستان در خاروغ تاجیکستان
۸صبح، کابل: وزارت امور خارجه طالبان اعلام کرده که هیأتی از این وزارت از قونسلگری افغانستان در خاروغ، مرکز ولایت بدخشان تاجیکستان، دیدن کرده است.
قهار بلخی، سخنگوی وزارت امور خارجه طالبان، روز شنبه، ۵ حمل، در رشته توییت‌هایی گفته که محمد موسا امیری، رییس مالی و اداری این وزارت، ریاست این هیأت را بر عهده داشته است.
بلخی گفته که این هیأت افزون بر ارزیابی امور قونسلی خسارات رسیده به تعمیر قونسلگری را نیز بررسی کرده است.
طالبان مدعی شده‌اند که تعمیر قونسلگری افغانستان در خاروغ تاجیکستان در پی سرازیر شدن برف‌کوچ آسیب دیده است.
طالبان عکس و ویدیویی از دیدار این هیأت از قونسلگری افغانستان در ولایت بدخشان تاجیکستان نشر نکرده‌اند.
سفارت افغانستان در تاجیکستان هنوز در مورد این ادعای طالبان چیزی نگفته است.
گفتنی است که سفارت افغانستان در تاجیکستان هنوز به طالبان واگذار نشده و با پیروی از سیاست حکومت پیشین فعالیت دارد.
