کابل کۉچه‌لریده‌ مخدره ماده‌لرگه مبتلا بۉلگن شخصلر سانی آرتیشی؛ پایتخت اهالیسی خواطرده‌

ایلیا

کابل اهالیسی‌نینگ بیر قِسمی اوشبو شهر‌نینگ کۉچه‌ و یۉللریده‌ معتاد شخصلر سانی آرتیب باره‌یاتگنینی اَیتماقده‌. اولر‌نینگ تأکیدلشیچه‌، یقینده‌ مخدره ماده‌لر مادّه‌لر استعمال قیلیشنی باشله‌گن شخصلردن تشقری، «امید» معتادلیکدن دوالش مرکزیده‌ دوالنه‌یاتگن اَیریم بېمارلر هم پاکستان‌نینگ هوا هجوملریدن سۉنگ مرکزدن چیقریب یوباریلگن و ینه‌ کۉچه‌لرگه‌ قَیتگن. اولر‌نینگ اَیتیشیچه‌، مخدره ماده‌لرگه مبتلا بۉلگن شخصلر‌نینگ ینه‌ شهر کۉچه‌لری و یۉللریگه‌ قَیتیشی اۉغریلیک و چۉنتککېسرلیک کبی جنایتلر‌نینگ کۉپه‌ییشیگه‌ زمینه یره‌تماقده‌.

کابل اهالیسی شهرده‌ معتادلیککه‌ مبتلا بۉلگنلر سانی تاباره‌ آرتیب باره‌یاتگنیدن خواطر بیلدیریب، بو حالت دوام اېتیشی پایتختده‌ معتادلیک بیلن باغلیق اجتماعی ضرر و معمالر‌نینگ کېنگه‌ییشیگه‌ آلیب کېلیشی ممکنلیگینی اَیتماقده‌.

کابل اهالیسیدن بیری ستوده‌ «امید» معتادلیکدن دوالش مرکزیگه‌ قیلینگن هجومدن سۉنگ، معتادلیککه‌ مبتلا بۉلگن شخصلر ینه‌ شهر‌نینگ تورلی حدودلری و یۉل چېتلریده‌ کۉرینه‌ باشله‌گنینی اَیته‌دی. اونینگ قۉشیمچه‌ قیلیشیچه‌، دوالش جریانی‌نینگ یکونیگه‌ یېتکزیلمه‌گنی و دوالنیشدن کېینگی قۉللب-قوّتلش تیزیمی‌نینگ یۉقلیگی اوشبو شخصلر‌نینگ ینه‌ مخدره مادّه‌لر استعمال قیلیشگه‌ قَیتیشیگه‌ سبب بۉلماقده‌. اونینگ فکریچه‌، مخدره مادّه‌لرنی آسان تاپیش و اولر‌نینگ سوداسی دوام اېته‌یاتگنی هم بو معمانی ینه‌ده‌ کوچه‌یتیرماقده‌.

ستوده‌ شونده‌ی دېیدی: «شو کونلرده‌ شهر‌نینگ هر بیر بورچه‌گیده‌ مخدره ماده‌لرگه مبتلا بۉلگن آدملرنی اوچره‌تیش ممکن. بیر نېچه‌ کون آلدین یۉل چېتیده‌ کۉرپه‌ بیلن اوخلب یاتگن بیر کیشینی کۉردیم. اوندن بیر نېچه‌ قدم نریده‌ اېسه‌ باشقه‌ بیر کیشی دوکان آلدیده‌ اوخله‌یاتگن اېدی. مخدره مادّه‌لر سوداسیگه‌ چېک قۉییلمه‌گونچه‌ و معتادلیککه‌ مبتلا بۉلگنلرنی دوالش همده‌ قۉللب-قوّتلش بۉییچه‌ ثمره‌لی دستور ایشلب چیقیلمه‌گونچه‌، جمعیت بو معمادن خلاص بۉله‌ آلمه‌یدی».

کابل‌نینگ ینه‌ بیر یشاوچیسی سلیم (مستعار) هم شهر‌نینگ تورلی حدودلریده‌ معتاد بۉلگن شخصلر سانی آرتگنینی اَیته‌دی. اونینگ فکریچه‌، نشه‌ و باشقه‌ مخدره مادّه‌لرنی آسان تاپیش، شونینگدېک، اَیریم تکسی هیداوچیلری و باشقه‌ شخصلر تامانیدن اولر‌نینگ ساتیلیشی مخدره مادّه‌لرنی استعمال قیلیشنی تشله‌گن کیشیلر‌نینگ ینه‌ بو عادتگه‌ قَیتیشیگه‌ شرایط یره‌تماقده‌.

سلیم شونده‌ی دېیدی: «اوّل هم کابلده‌ چرس تاپیش ممکن اېدی، اما حاضر اونگه‌ یېتیب باریش انچه‌ آسانلشگن. شهر‌نینگ تورلی حدودلریده‌ آدملر چرس‌ استعمال قیلماقده‌. مخدره مادّه‌لر ساته‌دیگن اَیریم تکسی هیداوچیلرینی تنیمن. مزاج سۉره‌سه‌، اولر کېره‌کلی مادّه‌نی تاپیب بېریشه‌دی. حتا اویلر‌نینگ اۉزیده‌ هم چرس یېتیشتیریلماقده‌. مثلاً، عمکیم اۉز اوییده‌ چرس اېکه‌دی و او یېتیلگچ، اونی استعمال قیله‌دی».

کابل‌نینگ ینه‌ بیر یشاوچیسی آرمان معتاد بۉلگن شخصلر‌نینگ ینه‌ شهر کۉچه‌لریگه‌ قَیتیشی جنایتلر کۉپه‌ییشی حقیده‌گی خواطرلرنی ینه‌ده‌ کوچه‌یتیرگنینی اَیته‌دی. اونینگ قۉشیمچه‌ قیلیشیچه‌، اَیریم شخصلر مکتبلر یقینیده‌گی تار کۉچه‌لر و اهالی یشه‌یدیگن حدودلرده‌ یاشلرگه‌ مخدره مادّه‌لر همده‌ مست قیلووچی تابلت‌لرنی تکلیف قیلماقده‌.

آرمان شونده‌ی دېیدی: «پاکستان‌نینگ امید معتادلیکدن دوالش مرکزیگه‌ قیلگن هجومیدن سۉنگ، شهرده‌ گیاهوندلیککه‌ مبتلا بۉلگن شخصلر سانی کۉپه‌یدی و ترتیبسیزلیکلر هم آرتدی. بو وضعیت کوند‌ن-کونگه‌ ینه‌ده‌ تشویشلی توس آلماقده‌، چونکه‌ معتادلیکدن دوالش مرکزی هلی فعالیتینی قَیته‌ باشله‌مه‌گن و معتاد بۉلگنلر‌نینگ بیر قِسمی شهر‌نینگ تورلی حدودلریگه‌ ترقه‌لیب کېتگن. مېنینگ فکریمچه‌، کابل‌نینگ تورلی حدودلریده‌ اۉغریلیک، چۉنتککېسرلیک و اَیریم میده‌ جنایتلر‌نینگ کۉپه‌ییشی هم اوشبو وضعیت بیلن باغلیق. اَیریم حدودلرده‌، جمله‌دن، خیرخانه‌ و ۳۱۵-پسته سیده‌، مکتبلر یقینیده‌گی تار کۉچه‌لر و کیمسه‌سیز جایلرده‌ اَیریم شخصلر یاشلرگه‌ مخدره مادّه‌لر و مست قیلووچی تابلیت‌لرنی تکلیف قیلماقده‌. دستلب اولر بو مادّه‌لرنی یاشلرگه‌ بې‌پول بېریشه‌دی، یاشلر اولرگه‌ قره‌م بۉلیب قالگچ اېسه‌، پول طلب قیلیشه‌دی. بیز بو وضعیت دوام اېتیشی و فعالیت یوریته‌یاتگن گیاهوندلیکدن دوالش مرکزلری یۉقلیگی عاقبتیده‌ گیاهوندلیککه‌ مبتلا بۉلگنلر سانی همده‌ او بیلن باغلیق معمالر آرتیشیدن خواطرده‌میز».

کابل‌نینگ ینه‌ ایکّی یشاوچیسی سخی و شاهدالله معتاد بۉلگنلر احوالیگه‌ زودلیک بیلن اعتبار قره‌تیش و فعالیت یوریته‌یاتگن دوالش مرکزلرینی تشکیل اېتیش ضرورلیگینی تأکیدله‌ماقده‌. اولر‌نینگ اَیتیشیچه‌، بو وضعیتگه‌ بې‌پروا مناسبتده‌ بۉلیش ینه‌ده‌ کۉپراق اجتماعی و خوفسیزلیک معمالرینی کېلتیریب چیقریشی ممکن.

سخی شونده‌ی دېیدی: «کابلده‌ اۉغریلیک جوده‌ کۉپه‌ییب کېتدی. کېچه‌لری عموماً تینچلیگیمیز یۉق. اۉغریلیکلر کېچکی پیت‌نینگ باشیدن باشلب، تون‌نینگ تورلی ساعتلریده‌ صادر بۉلماقده‌. آدملر بو وضعیتدن خواطرده‌. بیراق معتاد بۉلگنلر سانیگه‌ کېلسک، اولر اوّلگیدېک کۉپ اېمسلیگینی اَیتیشیم کېره‌ک. آلدینگیگه‌ قره‌گنده‌‌ سانی کمه‌یگن، اما بریبیر شهر‌نینگ تورلی حدودلریده‌ اوچره‌ب توریشیبدی».

شاهدالله اېسه‌ شونده‌ی دېیدی: «اگر معتاد بۉلگن آدم‌نینگ ایشی و درآمدی بۉلمسه‌، مخدره مادّه‌لرنی اېسه‌ آسان تاپیش ممکن بۉلسه‌، او اۉز استعمالی اوچون پول تاپیش مقصدیده‌ اۉغریلیک و باشقه‌ ناقانونی ایشلرگه‌ قۉل اوریشی ممکن».

کابلده‌گی امید معتادلرنی دوالش مرکزی ۱۴۰۴-ییل ۲۵-حوت کونی پاکستان‌نینگ هوا هجوملری چاغیده‌ نشانگه‌ آلینگن اېدی. طالبان‌نینگ دعواسیگه‌ کۉره‌، هجوم وقتیده‌ اوشبو مرکزده‌ قریب اوچ مینگ نفر معتاد بۉلگن شخص دوالنه‌یاتگن اېدی. طالبان ایچکی ایشلر وزیرلیگی اوشبو هجومده‌ ۴۰۸ کیشی جان بېرگنی و ینه‌ ۲۶۵ کیشی یره‌لنگنینی معلوم قیلگن اېدی.

پاکستان معتادلیکدن دوالش مرکزینی نشانگه‌ آلگنینی رد اېتیب، اۉزی‌نینگ هوا هجوملری چاغیده‌ پاکستان طالبان حرکتی (تی‌تی‌پی) یشیرین بزه‌لری و اوشبو گروه‌نینگ قورال-یراغ انبارلرینی نشانگه‌ آلگنینی بیلدیرگن.

 

 

دکمه بازگشت به بالا