محنت وبرداش روایتی؛ اۉمنچ یالقینلری هیچ پیت اۉچمه‌یدی

او شوم کوندن اوچ ییل اۉته یپدی؛  اۉشه کون توستدن قارانغیلیک بیزنینگ یورتیمیزگه کۉلنکه تشله‌دی  و ایلینج نورینی کۉزلریمیزدن اۉغیرله‌دی.  او کونلر اېسیمده، اوییمده اۉلتیرگندیم خیالیمده یارقین کېله‌جکنی گوده‌له‌یردیم. بیراق توستدن  همه نرسه اۉزگردی. اوکونلر مېنینگ دنیام چوبه‌لیب کېتدی، اوکونلر مېنی قۉرقوو اضطرابلر قمره‌گندی، اوکونلرخفه‌لیک حسی وتیه‌نچسیزلیککه تۉلگندی. صنفداشلریم نینگ باشقه کولگولری سېسینی اېشیتمسدیم. ودرسلیک کتابلریمنی باشقه ورقلیه‌آلمسدیم. اۉز اوییمده بۉله‌توریب دېوارلری قۉرقینچ و امیدسیزلیکدن قۉییلگن تورمه ده یشه‌یاتگندېک سیقیلردیم.    

بو اوچ ییلده  قیلگن تجربم‌نی هیچکیم درک قیله آلمه‌سه کېرک؛ هیچ بیرنرسه‌سی آلدینگی دنیاگه اۉخشمه‌گن بیردنیاده ییتیب کېتیش‌ حسی. هرکون مینگلب جواب‌سیز سۉراقلر بیلن اویغنردیم؛ نیمه اوچون؟ نیمه اوچون؟  نېگه بیزنیگ دنیامیز بوندېک بۉلدی؟ نېگه بیزنینگ امیدلریمیز بیزدن آلیندی؟ بیراق جوابی یۉق اېدی،  یخلیت اچیق وآغیرجیملیک. بو اوچ ییل جریانیده  کۉرگن اچیق مصیبتلر ویوتگن عذاب وعقوبتلرنی تۉلیق طرزده بیان قیله‌آلمه سم کېرک. بو اوچ ییل مېنگه، اوچ ییل همه نرسه نی قۉلدن بېریش اېدی، اۉتمیشگه حسرت بیلن تفکر قیلیش، و اېرکینلیک بیلن مکتب کېتیب، صنفداشلریم بیلن درسگه شرکت قیلیشیم، دۉستلر بیلن کولیشیم بیراق اوکونلر تاپیلمس اوزاق خاطره‌گه ایلنگن.

کۉنگلیمده‌گی دردلر یالغیز تعلیم وتحصیلنی قۉلدن بېریش دردی اېمس. بودرد چوقور راق وکېنگ راق دیر. کیملیگیمیز ونفسیمیز عزتینی قۉلدن بېریش دردی. سېنگه بیر قیزصفتیده اېرکینلیک بیلن جمعیتده حرکت قیلیش رخصتینی بېرمه‌سه‌لر، سېسینگنی اۉچیرسه‌لر  وحقینگنی نظرده توتمه‌سه‌لر بو حسلر  قلبینگنی یره‌لنتیره‌دی، وقلبینگنی یره‌سی کوندن کونگه شیلرغه‌له‌نیب مرحم سیزلیککه ایلنه‌دی.    

بو اوچ ییل مېنگه وکۉپ قیزلرگه درد و رنجلی اېدی؛  اېریشیش اوچون سعی وتلاش قیلگن کېله جگیمیزنی قۉلدن بېریش دردی، بیزگه تېگیشلی بۉلمه‌گن دنیا تیریکلیگی رنجی. حسرت بیلن کېلجککه باقردیم بۉغزیم تۉلیب کېلردی، نامعلوم کېلجککه اۉیلردیم  سکوت وجیملیک یاغیلیب ساعت تیک تیگیدن باشقه سېس قالمه‌گن بیر زهات کۉز یاشیم همقطار کېته باشله‌یدی اونینگ اۉنگینی آلالمه‌یمن. بو یاشلر کوچسیزلیک یاشی اېمس بو امیدسیزلیک، بېکسلیک وقارانغیلیکده قالگنلیکدن آقه باشله‌گن یاشلردیر. بو ایاو سیز دنیاده ییتیب کېتگنلیگیمنی سېزه‌من. بو یېرده هیچ کیم سېسیمنی اېشیتمه‌یدی وهیچکیم مېنگه اهمیت بېرمه‌یدی.    

دېمک شولرنینگ برچه‌سی بیلن ایچکی کېچینمه لریم مېنی تیریک اسره‌یدی. او بیرکیچیک یالقیندیر گاهیده نوری آزه یه‌دی  ولی هیچ پیت اۉچمه‌یدی. بو یالغیز هرکون  ینگی‌د ن توریب  دردو محنت لریمگه دوچ بۉلیب بو قیین کونلر بیرکون اۉتیشی وبیز ایسته گن غایه ومقصدلریمیزگه  امیدینی قۉلدن بېرمسلیککه سبب بۉله‌دی.

بو اوچ ییلده با بار اۉزیمنی وبو قاره‌لیک آره‌سیدن بیر یاختیلیک تاپیب اونگه تیه نیش‌گه  اولگوردیم. بو یاختیلیکنی گاهیده  بیر دۉست کۉزیده کۉرسم وگاهیده هم دنیا قنچه ایاوسیزلیگینی بیلمه‌گن  گودک تبسملریده کۉرردیم. بو لحظه‌لر  کیچیک واۉتکینچی بۉلسه‌یم  مېنگه تنغه ییم سووسیزلیکدن قوریگن پیتده گی سووتامچیلریدېک اېدی، اولرمیېگه بو قارانغیلیککه تۉله دنیاده  هوزهم امید دېره زه سی بارلیگینی معلوم قیلردی.

بیراق بو ییللرنینگ برچه دردلرینی تۉلیق بیان قیله آلمه‌دیم.  بودرد هرقنده‌ ی یره‌دن تېره‌نلیگینی گوده‌لش ممکن، بودرد کوندن کونگه چوقورله‌شیب وهرگز توزه لمه‌یدیگن یره‌گه ایلنگن. بودردلرنی چیدش گه سبب بولگن نرسه  کیچیک بۉلسه‌یم باشقه لرگه یاردم  زمینه سینی یره‌تیش ایشلری بیل‌ شغله نیشیم اېدیم.   

بو اوچ ییل اېنگ قیین شرایطده هم امیدنی قۉلدن بېرمسلیکنی مېنگه اۉرگتدی. قۉلدن بېرگن نرسه‌‌لریمنی قیته قۉلگه کېلتیره آلیشیم ممکن بۉلمه‌سه کېرک، مېنی کوتیب تورگن کېله جککه یېتیشیش اوچون تلاش قیلیشیم ممکن. مېن بو«قارانغیلیک مېنی یېنگه آلیشی ممکن اېمس »سۉزینی هرکون تکرار قیله‌من.

بو روایت یالغیز مېنینگ داستانیم اېمس  بو روایت  شو اوچ ییل ده بیر بیراویگه اۉخشه گن دردلرنی باشیدن کېچیرگن مینگرچه قیزلرداستانی دیر. بو داستان یاغیلیب تورگن برچه قیینچیلکلرگه قره‌می هنوز یارقین کېله جککه کۉزتوتگن قیزلرداستانی‌دیر. بو اوچ ییل قارانغیلیک اۉرته‌سیدن هم  یۉلیمیزنی یارقین قیلووچی  یاختی لیک تاپیشنی اۉرگتدی، بویاختی لیک آیدن کېله جککه بۉلگن امید بۉلسه کېرک. نیمه بۉلسه هم بو یاختیلیک بیزنی تیریک اسره‌یدی، برچه نرسه یۉقالگن سېزیلگن پیتده بیزگه کوچ بغیشله‌یدی.

بو قارانغیلیک بیرکون کۉتریلیب بیز امیدبیلن باش کۉتریب بیر یارقین کېله جک تامان آدیم تشله‌شیمیزگه امیدیم بار. اوشه کونگچه مېن وباشقه بو یورت قیزلری برداش وایاقده توریشیمیزگه دوام بېره‌میز. چونکه یخشی یۉکونلر یۉلده‌لیگینی بیله‌میزوانشالله بیزقیته عادی تیریکچیلیگیمیز  و قۉلدن بېرگن امیدلریمیزنی قۉلگه کېلتیره میز.

دکمه بازگشت به بالا