پاکستان بیرلشگن ملتلر تشکیلاتی نینگ یاردم یوکلرینی تورخم و چمن آرقه‌لی یوباریشگه راضیلیک بېردی

۸صبح، کابل: پاکستان ییتکرمه‌لری نینگ خبر بېریشیچه، اسلام‌آباد بیرلشگن ملتلر تشکیلاتی نینگ یاردم یوکلرینی تورخم و چمن چېگره‌ اۉتیش یۉل‌لری آرقه‌لی افغانستان‌گه جۉنه‌تیشگه راضیلیک بیلدیرگن.

«دان» گزېته‌سی، ۱۳- قوس، پنجشنبه‌‌ کونی، خبر بېریشیچه، ایکی آی دوامیده‌ یاپیق قالگن اوشبو اۉتیش یۉل‌لریدن سۉنگ، پاکستان حکومتی افغانستان اوچون بیرلشگن ملتلر تشکیلاتی نینگ انسان‌پرورلیک یوکلرینی رسمیلشتیریشنی باشله‌گن.

خبرگه کۉره‌، یاردم یوکلرینی جۉنه‌تیشگه رخصت بېریش حقیده پاکستان نینگ سودا و ترانزیت باشقرمسی‌گه رسمی مکتوب یوباریلگن.

مذکور یوک‌لر بیرلشگن ملتلر تشکیلاتی نینگ اوچ تشکیلاتی‌گه تېگیشلی بۉلیب، اوچ باسقیچده یوباریله‌دی.

خبرده ایتیلیشیچه، بیرینچی باسقیچده، جمعی۱۴۳ کانتینر انسان‌پرورلیک یوکنی چمن و تورخم آرقه‌لی رسمیلشتیریشگه رخصت بېریله‌دی.

رسمیلر نینگ تصدیقلشیچه، اوشبو قرار تشقی ایشلر وزیرلیگی کۉرسه‌تمسی و پاکستان‌ده‌گی بیرلشگن ملتلر تشکیلاتی نینگ دایمی موافقلشتیرووچیسی بیلن مصلحتلشوولردن سۉنگ قبول قیلینگن.

رسمی مکتوبگه کۉره‌، یوکلر نینگ حرکتی اوچ باسقیچده عملگه آشیرلیب، بیرینچی باسقیچ، آزیق-آوقت محصولاتلری، ایکینچی باسقیچ، دارو-درمان و طبی انجاملر، اوچینچی باسقیچ اېسه، تعلیم خدمتلری بیلن باغلیق جهازلرنی اۉز ایچیگه آله‌دی.

پاکستان رسمیلری تأکیدلشیچه، چېگره‌ یۉل‌لری نینگ قیته آچیلیشی فقط انسان‌پرورلیک یوکلرنی اۉتکزیش اوچون مۉلجللنگن بۉلیب، طالبان بیلن اسلام‌آباد اۉرته‌سیده‌گی عادتی سودا نینگ قیته تیکلنیشینی انگله‌تمه‌یدی.

پاکستان طالبان بیلن حربی تۉقنه‌شوولردن سۉنگ افغانستان بیلن برچه‌ چېگره‌ اۉتیش یۉل‌لرینی یاپیب قۉیگندی.

دکمه بازگشت به بالا