هراتده دایمی برق اوزیلیشلری؛ اهالی برق تقسیماتیده‌گی عدالتسیزلیک و بللر آشگنیدن شکایت قیلماقده

هرات‌ شهری‌نینگ بیر قطار اهالیسی ایتیشیچه، بو ‌ ایسّیق هواده برق اوزیلیشلری ینه‌ده کۉپه‌یگن و آدملر آغیر معمالر بیلن یوزمه-یوز کېلماقده. اولرنینگ سۉزلریگه کۉره‌، برق کۉپینچه‌ اېرته‌لب ساعت ۹ دن کېچقورون ۸ گچه اوزلوکسیز اۉچیریله‌دی و بو اهالیگه کۉپلب قیینچیلیکلر توغدیرماقده. شو بیلن بیرگه‌، اهالی برق تۉلاولری‌نینگ یوقاریلیگی و حساب-کتابلرده شفّافلیک یۉقلیگینی تنقید قیلیب، شکایتلرنی کۉریب چیقه‌دیگن هېچ قنده‌ی جوابگر اداره‌ یۉقلیگینی ایتیشماقده.

تورلی ولایتلرده ایسّیق کوچه‌ییشی و برق‌نینگ دایمی اوزیلیشی باره‌سیده‌گی اهالی خواطرلری دوام اېتر اېکن، هرات اهالیسی هم ده طالبان نظارتیده‌گی برشنا شرکتی مسووللری برق تقسیماتیده اۉزبیلرمانلیک بیلن ایش یوریته‌یاتگنینی تأکیدلشماقده.

هراتلیک بیر اهالی شونده‌ی دېیدی: «هرات‌ده برق اېرته‌لب ۹دن کېچقورون ۸ گچه اوزلوکسیز اۉچیریله‌دی. هوا جوده‌ ایسّیق، حتا ایچیشگه ساووق سوو هم یۉق، آدملر موز ساتیب آلیشگه مجبور. فرزندی بار عایله‌لرده باله‌لر ایسّیقدن کسل بۉلیب قالماقده. تیکووچیلر کبی ایشلاوچیلر ایشی ایزدن چیقیپتی؛ مزاج بویورتمه‌لری کېچیکیب کېته‌دی و بو اولرنینگ ایشیگه جدّی ضرر یېتکزه‌دی.»

او ینه‌ قۉشیمچه‌ قیله‌دی: «حتا شفاخانه‌لر و کلینیکلر کبی ساغلیقنی سقلش مرکزلریده هم برق اوزیله‌دی، بو بېمارلر حیاتینی بیر لحظه‌ده خوف آستیگه قۉیه‌دی. عموماً، آدملر برق یۉقلیگی و قیمت تۉلاولردن شکایت قیلیشماقده.»

ینه‌ بیر هرا‌تلیک اهالی ایته‌دی: «هر کونی بیر بهانه‌ بیلن برق‌نی اۉچیره‌دیلر. کېچه‌ بوتونله‌ی برق یۉق اېدی. کۉپ کونلرده ایکی یا اوچ ساعتدن آرتیق برق بۉلمه‌یدی. برق تقسیماتیده عدالتسیزلیک بار: بیر قسمده برق بار، باشقه‌ قِسمده عموماً یۉق.»

کۉپلب اهالی‌نینگ ایتیشیچه، هرات‌ده ییل نینگ هر فصلیده تورلی بهانه‌لر بیلن برق اوزیله‌دی و بونگه آلدیندن هېچ قنده‌ی آگاهلنتیریش بېریلمه‌یدی. اولرنینگ سۉزلریگه کۉره‌، سۉنگگی هفته‌لرده کۉپ کونلرده برق اتیگی ایکی یا اوچ ساعتدن آشمه‌گن.

جمشید (مستعار) دېیدی: «کېچه‌ اېرته‌لب ساعت ۶ دن کېچقورون ۶ گچه برق یۉق اېدی. هر سفر اوستونلرنی ترمیمله‌یمیز یاکه تخنیکی معما بار دېییشه‌دی، اصلیده اېسه برق اولنیشی و اوزیلیشی هم حدودلرگه قره‌ب، عدالتسیز طرزده عملگه آشیریله‌دی. بایلر و دولت خدمتچیلری یشه‌یدیگن اَیریم حدودلرده اوزیلیش جوده‌ کم، بعضی حدودلرده اېسه عموماً برق یۉق.»

او ینه‌ قۉشیمچه‌ قیله‌دی: «قیشده موزلش و اوستونلرنینگ قوله‌شیدن، بهارده بۉران و شماللردن، یازده اېسه تخنیکی معمالردن برق اوزیله‌دی. معمالر هېچ قچان حل قیلینمه‌گن بۉلسه هم، برق پوللری اۉز وقتیده تۉله‌نیشینی طلب قیلیشه‌دی. آخرگی پیتلرده برق تۉلاوی عایله‌لرنینگ حقیقی صرفیدن بیر نېچه‌ برابر کۉپ کېلماقده، آدملرنینگ تۉله‌شگه قُربی یېتمه‌یدی و هېچ کیم جواب بېرمه‌یدی.»

شو بیلن بیرگه‌، هرات اهالیسی دایمی برق اوزیلیشلری بیلن بیرگه‌ برق تۉلاولری هم یوقاریلیگینی، حساب-کتاب قَیسی مېزان اساسیده قیلینه‌یاتگنینی بیلمسلیکلرینی ایتیشماقده.

هرات یشاوچیسی مریم‌نینگ ایتیشیچه، برق اوزیلیشیگه قره‌مه‌ی، تۉلاو صرفگه ماس اېمس. او برق‌نی جوده‌ تېجه‌ب ایشله‌تگن بۉلسه هم، تۉلاو سابق آیلرده‌گیدېک کېلگنینی ایته‌دی.

اسمی آشکار اېتیلیشینی ایسته‌مه‌گن ینه‌ بیر هراتلیک دېیدی: «بیزده صرف کم، برق کۉپ وقت اۉچیق بۉله‌دی، اما تۉلاو جوده‌ یوقاری. ایلگری بېش مینگ افغانی کېلگن بۉلسه، حاضر ۱۰ یا ۱۶ مینگ افغانیگچه کېلماقده. بعضیلرگه حتا ۲۵ مینگ افغانیگچه کېلگن. شو سبب کۉپچیلیک قویاش پنېلی آلیب، قویاش انرژیسیدن فایده‌لنماقده.» اونگه کۉره‌، آدملرنینگ شکایتینی اېشیته‌دیگن هېچ قنده‌ی اداره‌ یۉق و کمبغللردن تورلی یۉللر بیلن پول اوندیریلماقده.

بوندن تشقری، هرات اهالیسی برق یۉقلیگی سببلی شهر سووی هم منتظم اوزیله‌یاتگنینی ایتیشه‌دی. الهام (مستعار) دېیدی: «شهر سووی هم دایمی اوزیله‌دی. کېلگنیده هم جوده‌ سست بۉله‌دی و فقط کېچه ساعت ۲ لر اطرافیده سوو کېله‌دی. کوندوزی برق یۉقلیگی سبب آدملر کېچه سوو توپلشگه مجبور، اگر کوندوزی سوو توگه‌سه، اولر کېچه‌سی برق کېلیشینی کوتیب سوو آلیشه‌دی.»

بو خواطرلر بوندن آلدین کابل اهالیسی هم ده برشنا شرکتی تامانیدن برق تۉلاولریده آرتیقچه اوندیریشلردن شکایت قیلگن بیر پیتده بیلدیریلماقده. اولرنینگ ایتیشیچه، سۉنگگی آیلرده برق صرفی کمه‌یگن بۉلسه هم، تۉلاولر مقداری سېزیلرلی درجه‌ده آشیب کېتگن و بو حاضرگی شرایطده کۉپلب عایله‌لر اوچون آغیر یوک بۉلیب قالماقده.

دکمه بازگشت به بالا