روحی توشکونلیک و مجبوری نکاح؛ قیزلر انقراضیگه قرشی کورهشده روحی دوالشنینگ اۉرنی
امین کاوه
طالبان حاکمیتگه کېلگنیدن سۉنگ و اوشبو گروه تامانیدن عیاللرگه نسبتاً اجتماعی همده تعلیم ساحهلریده کېسکین چېکلاولر جاری اېتیلگهچ، قیزلر و عیاللر نینگ حیاتی کېسکین درجهده تأثیر آستیده قالگنینی «قیزلر اوچون هدیه» تشکیلاتی نینگ ییللیک گزارشیده کۉرستیب اۉتیلگن. تعلیم و ایشلش نینگ تعقیقلنیشی، قشاقلیک و کمبغللیک، خوفسیزلیک حسی نینگ یۉقلیگی و ناانیق کېلهجک، مجبوری و وایهگه یېتمگنلر نکاحلری نینگ کۉپهییشی، شخصیلیک انقراضلری، آغیر روحی توشکونلیک و اۉز جانیگه قصد قیلیش حالتلری اوشبو تشکیلات تامانیدن روحی مصلحتلری جریانیده قیزلردن قید اېتیلگن حالتلر جملهسیگه کیرادی. تشکیلاتگه کۉره، عیاللر و قیزلر روانشناسلیک مصلحت و مخصوص روحی خدمتلریگه کېسکین احتیاج سېزماقده، حاضرگچه قمرهب آلینمگنلر اېسه گروه مشغولاتلری، عایلهلرنی خبردار قیلیش و عدالت همده تېنگلیککه اېریشیش یۉلیده آنگلی قرشیلیک و برداشلیلیک اصوللرینی اۉرگنیشنی ایستماقده.
افغانستانده تعلیمدن چېتده قالگن قیزلر اوچون روان درمانلش لایحهسینی عملگه آشیریب کېلهیاتگن «قیزلر اوچون هدیه» تشکیلاتی اۉزی نینگ ییللیک گزارشید ۲۰۲۵-ییلده، ۱۳ یاشدن ۱۹ یاشگچه بۉلگن قیزلر اوچون روان درمانلش مشغولاتلرینی اۉتکزیش آرقهلی ۵۸۸ نفر قیزنی قۉللب-قوتلش دستوری بیلن قمرهب آلگنینی معلوم قیلگن. اوشبو تشکیلات ضرور قۉللب-قوتلشلر یېتیشمگنی سببلی ۲۰۲۵-ییلنی اۉز فعالیتی دوامیده اېنگ مرکب ییل صفتیده بهالهگن.
تشکیلات گزارشیده قید اېتیلیشیچه، جاری میلادی ییلده کابل، پروان، پنجشیر، کاپیسا، بامیان، قندز، بدخشان، ننگرهار، قندهار و هرات ولایتلریده جایلشگن ۲۷ مرکزده ملکهلی روان درمانلش بوییچه مصلحتچیلری تامانیدن تورلی اصوللردن فایدهلنگن حالده قیزلرگه روان درمانلش مصلحت و روان درمانلش خدمتلری کۉرسهتیلگن.
«قیزلر اوچون هدیه» تشکیلاتی گزارشیده ایتیلیشیچه، ۲۰۲۵-ییل دوامیده مجبوری و وایهگه یېتمهگنلر نکاحی، تروما، اۉز جانیگه قصد قیلیشگه اورینیش، شخصیلیک انقراضی، جسمانی کمسیتیلیش حسی، اۉرگنیشدهگی معمالر، دقت نینگ پسهییشی، بېزاوتهلیک، استریس، خلق-اطوار معمالری، عایلهوی نزاعلر، اۉقیشدهگی کۉرستکیچلر نینگ پسهییشی و یامان معامله حالتلری بۉییچه ایشلر قید اېتیلگن.
گزارشیده، شونینگدېک، اوشبو دستور اشتراکچیلری تامانیدن روان درمانلش مصلحتلری آرقهلی بیلدیریلگن شکایتلر عایلهوی زۉرآورلیک، کېسکین اجتماعی چېکلاولر، بېزاوتهلیک، روحی توشکونلیک، تعلیمگه کیریش امکانیتی نینگ یۉقلیگی، عیاللر نینگ عدلیه و محکمه اۉرگانلریگه مراجعت قیله آلمهسلیگی، قشاقلیک و کمبغللیک، ساغلیق بیلن باغلیق معمالر، حسی معمالر همده عیاللر اوچون ایش امکانیتلری نینگ یۉقلیگینی اۉز ایچیگه آلگنی قید اېتیلگن.
گزارش نتیجهلریگه کۉره، کېسکین چېکلاولر نینگ جاری اېتیلیشی، تعلیم و ایشلش نینگ تعقیقلنیشی، قشاقلیک و کمبغللیک، خوفسیزلیک حسی نینگ یۉقلیگی و ناانیق کېلهجک مجبوری و وایهگه یېتمگنلر نکاحلری نینگ کۉپهییشیگه، شونینگدېک، اۉز جانیگه قصد قیلیش حالتلری نینگ آرتیشیگه سبب بۉلگن و میلیونلب عیاللر نینگ حیاتینی چوقور روحی توشکونلیک تأثیری آستیده قالدیرگن.
گزارشده ایتیلیشیچه، ۲۰۲۱-ییلدن کېین تعلیمدن محروم بۉلگن قیزلر آغیر افسرده لیکگه دچار بۉلگن و روان درمانلش مصلحتی همده مخصوص روان درمانلش خدمتلریگه کېسکین احتیاج سېزماقده. گزارش تیارلاوچیلری قیزلر سۉزلریگه تهیهنیب، اولر کۉپراق مرکزلر تشکیل اېتیلیشینی و اینیقسه، اۉز عایلهلری اوچون مصلحت همده خبردارلیک مشغولاتلری اۉتکزیلیشینی ایستهیاتگنینی بیلدیرگن.
شونینگدېک، گزارشده ایتیلیشیچه، اوشبو دستورگه کیرمگن شخصلر تشکیلات بیلن صحبتدن سۉنگ کیچیک گروهلر شکلیده روحی درمانلش مشغولاتلری اۉتکزیلیشینی سۉرهگن. اولر طالبان حکمرانلیگی آستیده، اونده هېچ قندهی اېرکینلیک موجود بۉلمگن شرایطده، یششگه ماسلشیش، آنگلی قرشیلیک و برداشلیلیک یۉللرینی اۉرگنیش همده عدالت و تېنگلیککه اېریشیش اوچون حرکت قیلیشنی ایستشگن. تشکیلاتگه کۉره، اقتصادی وضعیت نهایتده آغیر بۉلیب، عیاللر جدی مالیوی معمالر بیلن یوزلشماقده. ایش اۉرینلری نینگ یۉقلیگی و درآمدسیز حیات روحی و روحی معمالرنی کوچهیتیرگن، کېلهجککه بۉلگن امیدسیزلیک اېسه ینهده چوقور و تشویشلی توس آلگن.





