منبعلر: طالباننینگ دینی مدرسهلرگه اعتبار قرهتیشی اۉقووچیلرنی درسلردن ساووتماقده
۸صبح، کابل: مکتب اۉقووچیلرینینگ درس وقتیده اوخلب قالگنلیکلری عکس اېتگن صورتلر ترقهلگنیدن سۉنگ، منبعلر اۉقووچیلرنینگ طالبان تامانیدن دینی مدرسهلرگه یوقاری اعتبار بېریلیشی و مکتبلر حالتیگه بېپروالیک سببلی درسلردن ساویب بارهیاتگنینی بیلدیرماقده.
منبعلر سهشنبه، ۲۹ ثور، ۸صبح گزېتهسیگه بېرگن صحبتیده طالبان قَیته حاکمیتگه کېلگنیدن سۉنگ مملکتده زمانهوی تعلیم تیزیمی تیزیملی روشده تنزل و یۉق بۉلیش سری کېتهیاتگنینی ایتگن.
منبعلرگه کۉره، طالبان نینگ اساسی اعتباری دینی مسألهلرنی مدرسهلر آرقهلی اۉقیتیشگه قرهتیلگن.
شونینگدېک، اَیریم مکتبلرده ریاضی، فزیک و کیمیا کبی اساسی فنلر اۉرنیگه جهادی، سیاسی، حربی و طالبان بیلن باغلیق فکری موضوعلرگه کۉپراق وقت اجرهتیلهیاتگنی بیلدیریلگن.
منبعلر تأکیدلشیچه، مملکت تعلیم تیزیمیده زمانهوی تعلیم صفتی پسهییشی و دینی مکتبلرگه اعتبار آرتیشی حقیدهگی خواطرلر دوام اېتماقده.
شو بیلن بیرگه، اقتصادی معمالر سببلی اۉقووچیلر و طلبهلر تعلیم جریانیدن چېتده قالماقده، طالبان سیاستی و چېکلاولری اېسه اولرنی ینهده بېفرق بۉلیشگه مجبور قیلماقده.
بیراق خلقارا بیر سۉراوگه کۉره، طالبان بیر مکتب قوریش اۉرنیگه ۱۵ ته دینی مدرسهنی کتّه خرجتلر عوضیگه برپا اېتگن.





