یونیسف: افغانستانده میلیونلب باله‌لر، اینیقسه‌ قیزلر، مکتبگه باریش امکانیدن محروم قالگن

۸صبح، کابل: بیرلشگن ملتلر تشکیلاتی نینگ باله‌لرنی قوللب- قوتلش جمغرمه‌سی (یونیسف) معلوم قیلدیکی، افغانستانده‌گی تعلیم تیزیمی مثلسیز انقراضگه دوچ کېلگن و میلیونلب باله‌لر، اینیقسه‌ قیزلر، اۉقیش امکانیدن محروم قالگن.

یونیسف، یکشنبه‌ کونی، ۲۰ میزان، اعلان قیلگن حساباتیده شونده‌ی دېگن: سیاسی چېکلاولر، بودجه تنقیصلیگی و انسانپرورلیک انقراضلری نینگ کېتمه-کېتلیگی اۉتگن ییگیرمه‌ ییل ایچیده قۉلگه کیریتیلگن یوتوقلر نینگ کته‌ قسمینی بېکار قیلگن همده‌ تېنگسیزلیکنی ینه‌ده کوچه‌یتیرگن.

حساباتگه کۉره‌، قیز باله‌لر آلتینچی صنفدن کېین اۉقیشدن محروم اېتیلگن و ایکی میلیوندن آرتیق قیز مکتبگه باریش تعقیقلنگن حالده قالماقده.

اۉقیتووچیلر، اینیقسه‌ عیاللر سانی نینگ کملیگی همده‌ اساسی توزیلمه‌ نینگ ضعیفلیگی تعلیم صفتینی پسه‌یتیرگن. افغانستانده‌گی مکتبلر نینگ دېیرلی یرمی ماس بنا اېگه‌ اېمس، ۷۹ فایزیده برق یۉق و کۉپلب مکتبلرده ایچیملیک سووی همده‌ صحی خدمتلری موجود اېمس.

یونیسف، شونی هم قۉشیمچه‌ قیله‌دیکی، دولت مکتبلریده اسلامی فنلر هفته‌لیک اۉقوو ساعتلری نینگ دېیرلی یرمینی تشکیل اېتماقده، بو اېسه دینی تعلیمگه اجره‌تیله‌دیگن وقت نینگ آرتگنینی انگله‌ته‌دی.

حساباتده ایتیلیشیچه، اۉقوو نتیجه‌لری حلی هم جوده‌ پست، ۱۰ یاشلی باله‌لر نینگ ۹۰ فایزیدن آرتیغی عادی متننی اۉقی آلمه‌یدی و بو حالت اۉرگنیش انقراضینی ینه‌ده چوقورلشتیرماقده.

بیرلشگن ملتلر تشکیلاتی باله‌لرنی قوللب- قوتلش جمغرمه‌سی نینگ معلوم قیلیشیچه، ۲۰۲۳ ییلدن حاضرگچه ایران و پاکستاندن ایکی میلیوندن آرتیق کیشی نینگ قیتیب کېلیشی افغانستان تعلیم تیزیمیگه ینه‌ده کته‌ باسیم کېلتیرگن.

تشکیلات نینگ تأکیدلشیچه، قیتیب کېلگن باله‌لر نینگ کۉپچیلیگی، اینیقسه‌ ۱۲ یاشدن کته‌ قیزلر، اساسی توزیلمه تنقیصلیگی و موجود چېکلاولر سببلی مکتبلرگه باره آلمه‌یپتی.

دکمه بازگشت به بالا