اردوغان: اسراییل جنایت ایشلریده هیتلردن اۉتکزگن
تورکیه جمهور باشلیغی رجب طیب اردوغان، اسراییل دولتی غزه ده گناهسیز قریب ۱۴ مینگ بالهنی اۉلدیریش بیلن، «جنایت و شفقتسیزلیک» ده نازیلر رهبری، آدولف هیتلردن اۉتکزگنینی معلوم قیلگن.
اردوغان بو سۉزلرنی ۱۷ اپریل، چهارشنبه کونی تورکیه پارلمانیده عدالت و ترقیات حزب نینگ گروهی ییغیلیشیده بیان قیلگن.
او اسراییل تامانیدن فلسطین خلقی نینگ قیرغین بولهیاتگنینی بشریت تاریخیدهگی «اویتلی» واقعه عنوان قیلگن.
تورکیه جمهور باشلیغی اسراییل بیلن حماس آرهسیدهگی اوروش گه اشاره قیلیب ایتیشیچه: «مستقللیکّه اېریشیش اوچون بها تولشنی یخشیلیک بیلن بیلهمیز.»
آناتولی آژانسی نینگ گزارشی اساسیده، اوشبو ییغیلیشده اردوغان ېنه بیر بار فلسطین خلقینی قۉللب-قوتلش گه تاکیدلهگن.
ایتیش کېرهک که اسراییل اردوسی نینگ غزه گه هجومیدن سۉنگ، انقره و تلآویو مناسبتی کېسکینلشگن.
شو بیلن بیرگه، بیرلشگن ملتلر تشکیلاتی نینگ بالهلردن حمایت قیلووچی صندیغی (یونیسف) نینگ اجرائیه مدیری کاترین راسل ۱۷ اپریل، چهارشنبه کونی غزه ده اوروش باشلنگنیدن بېری، فلسطینلیک ۱۳ مینگ ۸۰۰ باله قربان بولگنینی اېتگن.
راسل گه کوره، اوشبو مدت ایچیده ۷۶ مینگ کیشی یرهلنیب و باشقه مینگلب کیشی آچرچیلیک خوفی بیلن دوچ بولگنلر.
فلسطین ساغلیقنی سقلش وزیرلیگی نینگ معلوماتی اساسیده، اسراییل اردوسی نینگ غزه گه هجومیدن حاضرگچه ۳۳ مینگ ۸۹۹ کیشی هلاک بولیب و باشقه ۷۶ مینگ ۶۶۴ کیشی یرهلنگن.