8صبح، کابل: سایت انترنتی «اعماق» مربوط به داعش، با نشر ویدیویی، مدعی شده است که این ویدیو از جریان حمله موشکی این گروه از افغانستان به تاجیکستان ثبت شده است.
داعش با نشر این ویدیوی کوتاه گفته که حملات موشکی آنان از ولایت تخار افغانستان به اهداف نظامی در خاک تاجیکستان صورت گرفته است.
در پی نشر خبرها مبنی بر حملات موشکی داعش از افغانستان به تاجیکستان، چند روز پیش این گروه با انتشار بیانیهای گفت که برخی اهداف نظامی در خاک تاجیکستان را هدف قرار داده است.
پس از آن، مرکز رسانهای کمیته دولتی امنیت ملی تاجیکستان با تایید اصابت چند موشک به خاک این کشور، گفت که موشکها بهصورت تصادفی و در پی درگیری میان داعش و طالبان شلیک شده است.
برخی از رسانهها گزارش کردهاند که داعش از ولسوالی خواجهغار ولایت تخار هفت موشک را به خاک تاجیکستان شلیک کرده، اما مقامهای امنیتی تاجیکستان از اصابت چهار موشک دستساز از نوع BM-1 خبر دادند.
یک ماه پیش نیز گروه داعش با انتشار ویدیویی مشابه این، مدعی شد که از خاک افغانستان به اوزبیکستان چندین موشک شلیک کرده است. مقامهای اوزبیکستان اما این خبر را رد کردند.
این در حالی است که نگرانیها از افزایش تحرکات داعش و دیگر گروههای تروریستی در افغانستان جدی شده است. بهتازهگی آنتونیو گوترش، دبیرکل سازمان ملل متحد، از احیای تروریسم در افغانستان هشدار داده است.