اروپا اتفاقی روسیه نینگ موزله‌تیلگن سرمایه‌لری سودی دن اوکراین منفعتی اوچون فایده‌لنیش گه کېلیشدی
اروپا اتفاقی گه اعضا مملکتلر نینگ ایلچیلری روسیه نینگ موزله‌تیلگن سرمایه‌لری سودی دن اوکراین گه قورال-یراغ ساتیب آلیش و اوروشدن سۉنگ اوشبو مملکت نینگ قیته قوریش ایشلری گه صرفلنیشی اوچون کېلیشگن.
رویترز نینگ گزارشی اساسیده، اروپا اتفاقی ۸ می، چهارشنبه کونی بونده‌ی قرارنی قبول قیلگن.
۲۰۲۲ ییلده روسیه نینگ اوکراین گه هجومی و بو مملکت نینگ توپراغیدن اېریم قسملری روسیه اردوسی تامانیدن تصرف اېتیلگچ، اروپا اتفاقی مملکتلری مسکو سرمایه‌لرینی اوشبو مملکتلرده موزلتگنلر.
بو قرار کېله‌سی هفته سه‌شنبه کونی اروپا اتفاقی مالیه وزیرلری نینگ ییغیلیشیده تصویب اېتیلگن حالده، اوشبو مملکتلرده روسیه نینگ سرمایه‌لری سودی که قریب اوچ میلیارد دالر دیر اوکراین گه قورال-یراغ ساتیب آلیش و مذکور مملکت نینگ قیته قوریش ایشلری گه صرفلنیشی ممکن.
اروپا اتفاقی نینگ دوره‌ای ییتکچیلیک قیله‌دیگن بلجیک نینگ ایتیشیچه: «بو پول روسیه نینگ هجومی گه قرشی اوکراین گه قورال-یراغ ساتیب آلیش اوچون صرفلنه‌دی.»
ییتّی گروه گه اعضا مملکتلر ۲۰۲۲ ییلده مسکو نینگ اوکراین گه هجومیدن سۉنگ، روسیه نینگ قریب ۳۰۰ میلیارد دالر سرمایه‌لرینی توسگنلر.
اروپا اتفاقی و ییتّی گروه گه اعضا مملکتلر، روسیه و اوکراین اۉرته‌سیده اوروش باشلنگنیدن بېری، توسیلگن پوللردن فایده‌لنیب و اوکراین گه یاردم بیریش مسأله‌سینی محاکمه قیلیب کېلماقده‌لر.
آلدینراق امریکا اروپا مملکتلری گه، روسیه نینگ برچه سرمایه‌لرینی مصادره قیلیش گه مصلحت بیرگن اېدی، بیراق اروپا اتفاقی یورو اوچون بونده‌ی اقدام عاقبت‌لری خطری گه اشاره قیلیب، بو تکلیف گه قرشی‌لیک کورستگندی.
اۉتگن آی روسیه عملدارلری غرب مملکتلرینی اوشبو پوللر گه قول اۉرگن تقدیرده، «قتیق» جواب و «چېک‌سیز» حقوقی معمالر بیلن دوچ بولیشلری حقیده آگاه‌لنتیرگن اېدیلر.
