هرات ده ایکینلر گه چېگیرتکه‌لر نینگ باستیریب کېریشی؛ دهقانلر خلق‌ارا تشکیلات‌لر همکارلیگینی طلب قیلدی
هرات ولایتی کشک رباط سنگی، کشک کهنه و پشتون زرغون تومنلریدهگی دهقانلردن بیرقطاری ایکینلری گه چېگیرتکه‌لر نینگ باستیریب کېریشیدن نالیماقده‌لر. اولر چېگیرتکه‌لر مثلی کوریلمه‌گن بیرحالده بو ولایت گه باستیریب کېریب و دهقانلر نینگ بو طبیعی آفت نی یوق قیلیش گه کوچی یېتمه‌یدی و طالبان حاکمیتیده دولت اداره‌لری و خلق‌ارا تشکیلات‌لر همکارلیگینی طلب قیله‌دیلر.
هرات ولایتیده‌گی دهقانلردن بیرقطاری ایکینلری گه چېگیرتکه‌لر نینگ مثلی کوریلمه‌گن درجه ده باستیریب کېریشیدن خواطر بیلدیریب، چېگیرتکه‌لر ایکینلری گه باستیریب کېرگنیدن بیر هفته اوتماقده اېکن لېکن بو طبیعی آفت‌نی یوق قیلیش اوچون اولر گه دارو و امکانیت حاضرگچه بیریلمه‌گنینی معلوم قیله‌دیلر.
شو بیلن بیرگه، طالبان گه کوره، کشک رباط سنگی تومنیده چېگیرتکه‌لر گه قرشی کمپاین یولگه قویگنلر.
باشقه تاماندن، کشک کهنه و پشتون زرغون تومنلریدهگی بیرقطار دهقانلر نینگ ایتیشلریچه، بو ایکّی تومنده چېگیرتکه‌لرنی یوق قیلیش اوچون هېچ حرکت بولمه‌گن.
سۉنگی کونلرده‌گی یاغنچیلیک اولرنی خورسند قیلگن بولسه ده، بیراق چېگیرتکه‌لر نینگ باستیریب کېریشی اولر نینگ خواطری گه سبب بولگنینی اېته‌دیلر، هرات ده‌گی دهقانلر.
کشک رباط سنگی تومنی یشاوچیلریدن محمد عمر گه کوره، نیچه ییلدن سۉنگ کېتمه-کیت یاغینچیلیک گواهی بولگنلر. اونینگ ایتیشیچه، سۉنگی کونلرده‌گی یاغینچیلیک دهقانلرنی قوروقچیلیک دن قوتیلیش اوچون امیدوار قیلگن اېدی، اما ایکینلری گه چېگیرتکه‌لر نینگ هجومی خورسندلیکلرینی غم گه اېلنتیرگن.
محمدعمر نینگ کوپه‌یتیریشیچه: «چېگیرتکه‌لر نینگ ایکینلر گه باستیریب کېرگنیدن بیر هفته اوتماقده، بیرینچیدن ییرلر گه دارو سیپه آلمه‌دیک و ایکّینچیدن کېتمه-کیت قوروقچیلیک دن سۉنگ دهقانلر اقتصادی قیینچیلیک بیلن دوچ بولگن و حاضر بیر هفته دن کېین طالبان تامانیدن دارو یېتکزیب بیریلدی، اما دارولرنی اهالی اۉزی سیپماقده.»
چېگیرتکه‌لرنی یوق قیلیش توانیمیز یوق دیېدی، هرات ولایتی کشک کهنه تومنیده‌گی دهقانلر. اولر گه کوره، هرات ده طالبان ایکینچیلیک، سوغاریش و چاروانچیلیک ریاستی حاضرگچه بو تومنده چېگیرتکه‌لرنی یوق قیلیش اوچون کمپاین یولگه قویمه‌گن.
هرات کشک کهنه تومنیده دهقانلردن نورالحق نینگ اییتشیچه: «چېگیرتکه‌لرنی یوق قیلیش توانیمیز یوق، ۱۰ یا که ۲۰ جریب مساله‌سی اېمس، چېگیرتکه‌لر کشک کهنه ده‌گی برچه ایکینلر گه باستیریب کېرگن. اولسوالیکّه هم مراجعت قیلدیک بیراق چېگیرتکه‌لرنی یوق قیلیش اوچون طالبان تامانیدن حاضرگچه عملی اقدام بولمه‌گن.»
عین‌حالده، پشتون زرغون تومنیده‌گی دهقانلر اېکینلر گه چېگیرتکه‌لر نینگ باستیریب کېریشی گه دایر طالبان نی بی‌فرق‌لیک و ریجه‌سیزلیکّه عیبله‌یدیلر. اولر گه کوره، طالبان نینگ بوتومنده چېگیرتکه‌لرنی یوق قیلیش اوچون هېچ ریجه‌لری یوق.
پشتون‌زرغون تومنیده دهقانلردن بیری عبدالواسع گه کوره: «چېگیرتکه‌لر باستیریب کېرگنیدن اوچ تورت کون اوتماقده امکانیت و دارو یوق و تاپیلمه‌یدی هم، هر کونی طالبان اولسوالیگی گه مراجعت قیله‌میز کېلیب دارو سپیش وعده‌سینی بیره‌دیلر؛ بیراق بو ییرده چېگیرتکه‌لر ایکینلرنی یوق قیلماقده و هېچ کیم هم کېلمه‌یدی.»
هرات ده طالبان ایکینچیلیک ریاستی، چېگیرتکه‌لر کشک رباط سنگی، کشک کهنه و پشتون‌زرغون تومنلریده باستیریب کېرگنینی تصدیقله‌یدی. بو گروه چېگیرتکه‌لر گه قرشی کمپاین یولگه قوییلیشینی اېتسه ده، بیراق یالغیز کشک رباط سنگی تومنیده چېگیرتکه‌لر گه قرشی کمپاین باشلنگن و کشک کهنه و پشتون‌زرغون تومنلریده بو کمپاین یولگه قوییلیشی اوچون طالبان تامانیدن حاضرگچه قرار آلینمه‌گن.
عین‌حالده، هر ییلی کوکلم فصلی باشلنیشی بیلن مملکت نینگ بیرقطار ولایت‌لریده چېگیرتکه‌لر ایکینلر گه باستیریب کېره‌دی. اۉتگن ییل بادغیس ولایتی چېگیرتکه‌لر نینگ ایکینلر گه باستیریب کېریش گواهی بولیب و مذکور ولایت دهقانلری بوتوغریده طالبان نینگ همکارلیک قیلمسلیگیدن شکایت قیلگن اېدیلر.
