طالبان ۱۵ خانواده را به اتهام همکاری با جبهه مقاومت ملی در ولایت بغلان کوچ اجباری دادند

8صبح، بغلان: منابع محلی در ولایت بغلان می‌گویند که طالبان دست‌کم ۱۵ خانواده را در این ولایت کوچ‌ اجباری داده‌اند.

منابع روز شنبه، ۴ اسد، در صحبت با روزنامه 8صبح می‌گویند که طالبان از دو روز به این‌سو، این خانواده‌ها را در روستاهای خوش‌دره و خاووش ولسوالی خوست ولایت بغلان کوچ اجباری داده‌اند.

به گفته منابع، طالبان این خانواده‌های ییلاق نشین را به بهانه همکاری با جبهه مقاومت ملی کوچ اجباری دادند و شماری از این خانواده‌ها را نیز لت‌وکوب کرده‌اند.

طالبان به برخی‌ ازباشده‌گان دیگر این دو روستا نیز ۴۸ ساعت فرصت داده‌اند که خانه‌های‌شان را ترک کنند.

با این حال، منابع می‌گویند که این خانواده‌ها هیچ‌ رابطه‌ای با جبهه مقاومت ملی ندارند.

این درحالی است که در آغاز سال جاری نیز طالبان صدها خانواده را در ولسوالی های خوست، ده صلاح، اندراب‌ها و دوشی این ولایت که عمدتاً تاجیک‌نشین هستند، کوچ اجباری داده بودند.