۱۳،۸ میلیون افغان آزیق-آوقت خوفسیزلیگیدن محروم بۉلیش خوفی آستیده
۸صبح، کابل: بیرلشگن ملتلر تشکیلاتی اۉزینینگ ینگی حساباتیده افغانستانده ۱۳،۸ میلیون کیشی آزیق-آوقت خوفسیزلیگی بیلن باغلیق معماگه دوچ کېلیشی کوتیلهیاتگنینی معلوم قیلدی.
بیرلشگن ملتلر تشکیلاتی، باش کاتبی سهشنبه کونی، ۲۴ سنبله، افغانستاندهگی انسانپرورلیک وضعیت همان یامانلشیب بارهیاتگنینی اَیتدی.
حساباتگه کۉره، مهاجرلرنینگ کېنگ کۉلمده قَیتیشی، مبلغ یېتیشمسلیگی، سودا فعالیتیدهگی اوزیلیشلر و اقلیم اۉزگریشینینگ عاقبتلری اوشبو وضعیتنی ینهده آغیرلشتیرهیاتگن عامللردن دیر.
بیرلشگن ملتلر تشکیلاتینینگ افغانستان بۉییچه ۲۰۲۶-ییلگی انسانپرورلیک یاردمگه جواب رېجهسی اوچون ۱،۷۱ میلیارد دالر مبلغ کېرهک؛ بیراق حاضرگچه اونینگ اتیگی ۳۱،۲ فایزی تأمینلنگن.
حساباتگه کۉره، کوچلی یاغینگرچیلیک و تۉستدن یوز بېرگن سوو تاشقینلری هم افغانستاننینگ شرقی، جنوبی-شرقی و مرکزی حدودلریده سېزیلرلی انسانپرورلیک عاقبتلرنی کېلتیریب چیقرگن.
بیرلشگن ملتلر تشکیلاتی، شونینگدېک، منطقهدهگی بېقرارلیک و تأمینات زنجیریدهگی اوزیلیشلر آرتیدن انسانپرورلیک فعالیتگه قۉییلهیاتگن چېکلاولر کوچهیگنینی معلوم قیلدی.
حساباتگه کۉره، یاردم تشکیلاتلری ضرور ماتریاللرنی یېتکزیب بېریش اوچون مقابل یۉنهلیشلرگه، جملهدن، تورکیه و اروپا آرقهلی اۉتووچی لاجورد کریدوریگه مراجعت قیله باشلهگن.
شو بیلن بیرگه، بیرلشگن ملتلر تشکیلاتی افغانستاندهگی عیاللر و قیزلرنینگ احوالینی همان آغیر دېب بهالهگن.
تشکیلاتنینگ اَیتیشیچه، عیاللر و قیزلر تعلیم آلیش، ایشلش، اېرکین حرکتلنیش و جماعت حیاتیده اشتراک اېتیش بارهسیده کېسکین چېکلاولرگه دوچ کېلماقده.
