جهان آزیق- آوقت دستوری: مکتبدهگی طعاملر افغانستاندهگی کۉپلب بالهلر اوچون حیاتی اهمیتگه اېگه دیر
۸صبح، کابل: جهان آزیق- آوقت دستوری (WFP) معلوم قیلیشچه، مکتبلرده تقدیم اېتیلهدیگن طعاملر افغانستاندهگی کۉپلب بالهلر اوچون حیاتی اهمیتگه اېگه بۉلیب، کۉپینچه اولر نینگ کون دوامیده آلهدیگن بیرینچی طعامی دیر.
اوشبو تشکیلات، ۸- دلو، چهارشنبه کونی، اعلان قیلگن گزارشیده، اۉز شریکلری بیلن همکارلیکده افغانستان بۉیلب باشلنغیچ مکتب بالهلری نینگ سلامتلیگی و تعلیمینی قۉللب-قوتلشگه موفق بۉلگنینی تأکیدلهدی.
یونیسف آلدینراق، افغانستانده ۹۴۲ مینگ باله آغیر طعاملنیش یېتیشماوچیلیگیدن اذیت چېکماقده و ینه تخمیناً ۷۰۰ مینگ باله اۉرتچه درجهدهگی طعاملنیش یېتیشماوچیلیگیگه دوچ کېلماقده، بو اېسه بالهلر اوچون آزیقلنتیریش قۉللب-قوتلشی نینگ اهمیتینی آشیرهدی دیب، معلوم قیلگن اېدی.
جهان آزیق-طعام دستوری شونینگدېک، بو قیش موسمیده ۱۷ میلیوندن آرتیق افغانستانلیکلر جدی آزیق-طعام خوفسیزلیگی بیلن یوزمه-یوز اېکنلیگینی و آچلیک همده طعاملنیش یېتیشماوچیلیگی نینگ آشیب بارهیاتگنینی قید اېتدی.
شو بیلن بیرگه، بیرلشگن ملتلر تشکیلاتی دایمی روشده تأکیدلگنیدېک، یاردمنی دوام اېتتیریش و آزیقلنتیریش دستورلرینی کېنگیتیریش بالهلر نینگ ضعیفلیگینی کمیتیریش و اولر نینگ تعلیمینی قۉللب-قوتلشده حیاتی اهمیتگه اېگه بۉلیشی ممکن.
