یۉل قوریش لایحه‌لری‌نینگ یکونلنیشی کېچیکیشی؛ کابلده قتناو ینه‌ده قیینلشدی
ایلیا
کابل‌نینگ اَیریم اهالیسی شهرده یۉل قوریلیشی لایحه‌لری‌نینگ عملگه آشیریلیشی کېچیکه‌یاتگنی و بعضی یۉللر چله قاله‌یاتگنیدن شکایت قیلماقده. اولر‌نینگ اَیتیشیچه، اوشبو لایحه‌لر‌نینگ اۉز وقتیده یکونلنمسلیگی و قتناو یۉللری‌نینگ یاپیق قالیشی اهالی‌نینگ کونده‌لیک حیاتینی قیینلشتیرماقده. اولر‌نینگ سۉزلریگه کۉره، اساسی یۉللر‌نینگ یاپیلیشی موترلرنی ایلنمه و اوزاقراق یۉللردن فایده‌لنیشگه مجبور قیلگن همده شهر‌نینگ تورلی حدودلریده ترانسپورت تیربندلیگینی کوچه‌یتیرگن. کابل اهالیسی ایشلر‌نینگ قَیته-قَیته تۉخته‌تیلیشی وسابق لایحه‌لر یکونلنمسدن توریب ینگی لایحه‌لر‌نینگ باشلنیشی بو معمالرنی ینه‌ده کوچه‌یتیره‌یاتگنینی قۉشیمچه قیلماقده. اولر قیش فصلی و یاغینگرچیلیکلر باشلنیشی بیلن چله قالگن یۉللر همده شهرده‌گی قتناو ینه‌ده قیینلشیشیدن آگاهلنتیرماقده.
کابل اهالیسی طالبان نظارتیده‌گی کابل بلدیه‌سیدن لایحه‌لرنی عملگه آشیریش جریانینی تېزلشتیریش و قیشکی یاغینگرچیلیکلر باشلنیشیدن آلدین چله قالگن یۉل قِسملرینی یکونلشنی طلب قیلماقده.
کابلده‌گی خصوصی تشکیلاتلردن بیریده ایشله‌یدیگن احسان یۉل قوریلیشی لایحه‌لری‌نینگ چله قالیشی و اساسی یۉللر‌نینگ یاپیلیشی اونینگ کونده‌لیک قتناوینی قیینلشتیرگنینی اَیته‌دی. اونینگ قۉشیمچه قیلیشیچه، اَیریم یۉللر‌نینگ یاپیلیشی سببلی موترلر اوزاقراق یۉنه‌لیشلردن حرکتلنیشگه مجبور بۉلماقده. نتیجه‌ده او یۉلده کۉپراق وقت صرفلب، ایش جاییگه کېچیکیب یېتیب بارماقده.
احسان شونده‌ی دېیدی: «اوییمیزدن شهید تۉرت یۉلیگه باره‌دیگن یۉل جوده قتّیق یاپیلگن. موترلر اوزاقراق یۉللردن یوریشگه مجبور بۉلماقده. شو سببلی موترلر بېکتگه کېچیکیب کېله‌دی، یېتیب کېلگنیده اېسه یۉلاوچیلر اولرگه چیقیش اوچون یاپیریلیب کېلیشه‌دی. نتیجه‌ده بیز هر کونی ایش جاییمیزگه کېچیکیب یېتیب باره‌میز».
کابل‌نینگ ینه بیر یشاوچیسی سردار یۉل قوریلیشی لایحه‌لری‌نینگ سېکین عملگه آشیریلیشی و ایشلر‌نینگ قَیته-قَیته تۉخته‌تیلیشی اَیریم یۉللر‌نینگ اوزاق وقت دوامیده چله قالیشیگه سبب بۉلگنینی اَیته‌دی. اونینگ قۉشیمچه قیلیشیچه، اَیریم لایحه‌لرده یۉل قوریلیشی باسقیچمه-باسقیچ عملگه آشیریله‌دی: بیر قِسم قوریب بیتکزیلگچ، ایش تۉخته‌تیله‌دی و باشقه قِسملر اوزاق وقت توگللنمه‌گن حالده قاله‌دی. سردار‌نینگ سۉزلریگه کۉره، قریب ایکّی ییلدن بېری دوام اېته‌یاتگن بو حالت اهالی‌نینگ قتناوینی قیینلشتیریب، لایحه‌لر‌نینگ عملگه آشیریلیشینی هم زېریکرلی جریانگه ایلنتیرگن.
اوشبو ییگیت شونده‌ی دېیدی: «قریب ایکّی ییلدن بېری یۉل‌نینگ بیر تامانی قوریلگن، اما ایکّینچی تامانی هلی هم چله قالماقده. بعضاً یۉل‌نینگ بیر قِسمیگه اسفالت یاتقیزیشه‌دی، کېین ایش تۉخته‌ب قاله‌دی. بیرآز وقت اۉتگچ، باشقه قِسمیگه اسفالت یاتقیزیشه‌دی و ینه ایش تۉخته‌یدی. بو لایحه قریب ایکّی ییلدن بېری دوام اېتماقده و آدملر اوشبو وضعیت طفیلی جوده کۉپ معمالرگه دوچ کېلماقده».
کابل‌نینگ ینه بیر یشاوچیسی سید آغا‌‌نینگ اَیتیشیچه، یۉللر، کۉپریکلر و کیچیک کۉپریکلر کبی آست-قورمه لایحه‌لری‌نینگ چله قالیشی اهالی‌نینگ قتناوی همده یوک‌تشیش جریانیگه خلل بېرماقده. اونینگ قۉشیمچه قیلیشیچه، قیش فصلیده اوشبو لایحه‌لرنی دوام اېتتیریش ینه‌ده کۉپراق قیینچیلیکلرنی کېلتیریب چیقریشی، قوریلیش ماتریاللرینی تشیش خرجتلری و جریانینی هم مرکّبلشتیریشی ممکن.
کابل یشاوچیسی شونده‌ی دېیدی: «چله قاله‌دیگن لایحه‌لر، خواه یۉل بۉلسین، خواه کۉپریک یاکه کیچیک کۉپریک، اهالی‌نینگ قتناوی، یوک‌تشیش و ترانسپورت حرکتیده معمالر کېلتیریب چیقره‌دی. بیز‌نینگ طلبیمیز لایحه‌لرنی قیش کېلیشیدن آلدین یکونلش. اگر بیرار لایحه‌نی اۉز وقتیده توگه‌ته آلمسلیکلرینی بیلیشسه، اونینگ بجریلیش مدتینی قار و یامغیرگه دوچ کېلمه‌یدیگن طرزده بېلگیلشلری کېره‌ک. چونکه قیشده سمنت کبی اساسی ماتریاللر‌نینگ نرخی آشه‌دی و اولرنی تشیش هم قیینلشه‌دی».
کابل‌نینگ ینه بیر یشاوچیسی هاشم‌نینگ اَیتیشیچه، اَیریم حدودلرده یۉل قوریلیشی لایحه‌لری‌نینگ چله قالیشی یۉللر‌نینگ یاپیلیشیدن تشقری، ترانسپورت تیربندلیگی و چنگ-تۉزان‌نینگ کۉپه‌ییشیگه هم سبب بۉلگن. اونینگ قۉشیمچه قیلیشیچه، برکی یۉلی لایحه‌سی جوده سېکین عملگه آشیریلماقده و ایشلر‌نینگ دوام اېتیشی وطنداشلر‌نینگ قتناوینی قیینلشتیرماقده. هاشم‌نینگ سۉزلریگه کۉره، ایکّی ییل ایچیده یکونلنیشی رېجه‌لشتیریلگن کابل–جلال‌آباد موتر یۉلی لایحه‌سی حاضر اوچینچی ییلگه کیرگن بۉلسه-ده، هلی هم توگللنمه‌گن. اونینگ اَیتیشیچه، اوشبو لایحه‌لر سببلی یوزه‌گه کېلگن تیربندلیکلرده بعضاً عادتده‌گیدن ایکّی-اوچ ساعت کۉپراق وقت یۉلده قالیب کېته‌دی.
هاشم شونده‌ی دېیدی: «اَیریم جایلرده یۉل قوریلیشی سببلی اویلرنی بوزیشگن، یۉللر هم یاپیلگن. نتیجه‌ده تیربندلیک و چنگ-تۉزان کۉپه‌ییب، آدملر کۉپلب معمالرگه دوچ کېلماقده. برکی یۉلی لایحه‌سی جوده سېکین عملگه آشیریلماقده و تیربندلیککه سبب بۉلماقده. کابل–جلال‌آباد یۉلی لایحه‌سی هم ایکّی ییل ایچیده یکونلنیشی کېره‌ک اېدی، اما حاضر اوچینچی ییل بۉلیپتی، هلی هم توگللنمه‌گن. مېنیمچه، کېله‌سی قیشگچه هم بیتمسلیگی ممکن. شو تیربندلیکلر سببلی بعضاً عادتده‌گیدن ایکّی-اوچ ساعت کۉپراق یۉلده قالیب کېته‌من و قتناو مېن اوچون جوده قیینلشگن».
