هرات‌نینگ اسلام‌قلعه باجخانه‌سیده ییریک یانغین؛ نفت و گاز تانکرلری پارتله‌دی
۸صبح، هرات: محلی منبعلر هرات‌نینگ اسلام‌قلعه باجخانه‌سیده ییریک یانغین صادر بۉلگنینی، اوشبو حادثه‌ده کتّه نفت و گاز تانکرلری یانیب، پارتله‌گنینی اَیتماقده.
منبعلر چهارشنبه کونی، ۸ مېزان آقشامیده، ۸صبح گزېته‌سیگه بېرگن صحبتیده یانغین هلی هم دوام اېته‌یاتگنینی و اونینگ کۉلمی کتّه بۉلگنی سببلی حاضرچه نظارتگه آلینمه‌گنینی بیلدیردی.
یانغین جاییدن ترقه‌تیلگن ویدیولر اوشبو حادثه‌‌نینگ کوچی و کۉلمینی کۉرسه‌تماقده. ویدیولرده کتّه النگه و قویوق توتون هم کۉرینه‌دی.
منبعلر‌نینگ اَیتیشیچه، حاضرگچه یانغیننی اۉچیریش اوچون هېچ قنده‌ی چاره کۉریلمه‌گن و احتمال یانغین‌نینگ کۉلمی کتّه بۉلگنی سببلی اونی نظارتگه آلیش اوچون ایران تامانیدن یاردم کېره‌ک بۉلیشی ممکن.
اسلام‌قلعه چېگره‌سیده ایراندن قَیتگن مهاجرلر هم بار و منبعلرگه کۉره، یانغین صادر بۉلیشی آرتیدن بو آدملر آغیر شرایطده قالگن.
حاضرگچه یانغین سببی و اوشبو حادثه عاقبتیده یوزه‌گه کېلگن احتمالی تلفاتلر حقیده باتفصیل معلومات اعلان قیلینمه‌گن.
