قندوزده بیر شفاکار اۉلدیریلدی
۸صبح، کندز: محلی منبعلر قندوز ولایتینینگ دشت ارچی تومنی مرکزیده «خالیدین قرلق»، اسملی شفاکار نامعلوم شخصلر تامانیدن اۉلدیریلگنینی اَیتماقده.
منبعلر چهارشنبه کونی، ۱-مېزان، ۸صبح گزېتهسیگه بېرگن صحبتیده اوشبو شفاکار اۉتگن کون توش پیتی اۉز داروخانهسی ایچیده نامعلوم شخصلر تامانیدن پیچاق ضربهلری بیلن اۉلدیریلگنینی بیلدیردی.
حاضرگچه اوشبو شفاکارنینگ اۉلدیریلیش سببی حقیده قۉشیمچه تفصیلاتلر اعلان قیلینمهگن.
بو حالت ایکّی کون اوّل هم بادغیس ولایتی مرکزیده بیر شفاکار اۉلدیریلگن بیر پیتده یوز بېرماقده.
تاکیدلش جایزکی، سۉنگگی کونلرده مملکتنینگ تورلی حدودلریده جنایت حادثهلری، قوراللی اۉغریلیکلر، قاتللیکلر و خوفسیزلیک بیلن باغلیق معمالر کۉپهیگن، مملکت وطنداشلری اېسه طالباننی خلق خوفسیزلیگینی تامینلشده موفقیتسیزلیککه اوچرهگن دېب حسابلهماقده.
