افغانستاننینگ بیر میلیون وطنداشی قالین تۉقیش صناعتیده ایشلهیدی
۸صبح، کابل: طالبان باش وزیرینینگ اقتصادی اۉرینباسرلیگی معلوم قیلیشیچه، افغانستانده قریب بیر میلیون کیشی قالین تۉقیش صناعتیده محنت قیلماقده.
اوشبو اداره شنبه کونی، ۲۷ سرطان، اۉزینینگ ایکس صحیفهسیده سۉنگگی ییللرده افغانستان قالینلری چیتایلگه ساتیلیشی سېزیلرلی درجهده آشگنی و مملکتنینگ قۉلده تیّارلنهدیگن محصولاتلریگه خلقارا بازارلرده طلب آرتگنینی یازدی.
طالبان باش وزیرینینگ اقتصادی اۉرینباسرلیگی، قالین صادراتینینگ آشیشینی اوشبو صناعتنینگ جهان بازارلریدهگی موقعی مستحکملنهیاتگنینینگ بېلگیسی صفتیده بهالهدی.
قالین تۉقیش افغانستاننینگ عنعنوی و مهم صناعتلریدن بیری حسابلنهدی همده مملکتنینگ شمالی، غربی و مرکزی ولایتلرینینگ اَیریم حدودلریده کېنگ رواجلنگن. افغانستاننینگ قۉلده تۉقیلگن قالینلری عنعنوی نقشلری، صفتی و بدیعی قیمتی طفیلی جهان بازارلریده مملکتنینگ اېنگ مشهور محصولاتلریدن بیری دیر.
