عمر گلستان شهرچه‌سی اهالیسی: طالبان بیز ساتیب آلگن اویلرنی تارتیب آلیب اجاره حقی طلب قیلماقده
نیما
کابل شهری‌نینگ اوچینچی مکروریان حدودیده‌گی عمر گلستان شهرچه‌سی اهالیسی طالبان عدلیه وزیرلیگی اوشبو شهرچه‌نی «باسیب آلینگن یېر» دېب اعلان قیلگنی و اولرگه اجاره شرطنامه‌سی شکلینی تۉلدیریب، هر آی پول تۉله‌ش یاکه اویلرینی بۉشه‌تیش حقیده آگاهلنتیریش بېرگنینی اَیتماقده. اولر افغانستان‌نینگ سابق حکومتلری دوریگه عاید بیر قطار شرعی، رۉیخطگه آلیش و اداری حجتلرنی تقدیم اېتیب، شهرچه جایلشگن یېر آلدیندن خصوصی ملک بۉلگنینی، اونده‌گی بنالر اېسه رسمی جریانلردن اۉتیلیب، قانونی سرمایه حسابیگه قوریلگنینی تأکیدله‌ماقده. شهرچه اهالیسی اوشبو خاندانلرنی ساتیب آلگنینی و خرید همده ملک حقوقینی تصدیقلاوچی حجتلرگه اېگه اېکنینی بیلدیرماقده.
کابل‌نینگ اوچینچی مکروریان حدودیده‌گی عمر گلستان شهرچه‌سیده یشاوچی اَیریم اهالی طالبان عدلیه وزیری عبدالحکیم شرعی تامانیدن کوچه‌ییب باره‌یاتگن باسیملردن تۉیگنینی اَیتماقده. اولر‌نینگ تأکیدلشیچه، اوشبو شهرچه‌‌نینگ ملک حجتلری و قانونی رسمیلشتیریش جریانلری سابق حکومت دوریده یکونلنگن، خاندان اېگه‌لری هم خرید و ملک حجتلریگه اېگه. اولر‌نینگ سۉزلریگه کۉره، سابق حکومت‌نینگ شهرسازلیک وزیرلیگی، حاضرده طالبان نظارتی آستیده بۉلگن اوشبو لایحه‌ده ایکّی فایز اولوشگه اېگه. شونگه قره‌مه‌ی، طالبان‌نینگ مخصوص محکمه‌سی اهالی تامانیدن تقدیم اېتیلگن حجتلرنی تېکشیرمسدن، شهرچه یېرینی «باسیب آلینگن ملک» دېب اعلان قیلگن و اونی اوشبو گروه تصرفیگه اۉتکزگن.
عمر گلستان شهرچه‌سی اهالیسی طالبان عدلیه وزیری عبدالحکیم شرعی اولرنی اویلرنی اجاره‌گه بېریش شرطنامه‌سی شکلینی تۉلدیریشگه یاکه خاندانلرینی بۉشه‌تیشگه مجبورله‌یاتگنینی اَیتماقده. اولر‌نینگ سۉزلریگه کۉره، حاضرگچه طالبان عدلیه وزیریگه علاقه‌دار شخصلر تامانیدن ۳۰–۴۰ ته اوی هم تارتیب آلینگن. شهرچه اهالیسی طالبان مخصوص محکمه‌سی قراری چیقریلگنیدن کېین قریب یېتّی آیدن بېری اۉزلری ساتیب آلگن خاندانلرده یشش اوچون طالبانگه اجاره حقی تۉله‌شگه مجبور بۉله‌یاتگنینی بیلدیرماقده.
شهرچه اهالیسیدن بیری شونده‌ی دېیدی: «آدملر عدلیه وزیریگه [طالبان] بیر نېچه بار مراجعت قیلیشدی، اما افسوسکی، هېچ قنده‌ی نتیجه بۉلمه‌دی. حتا اوشبو گروه نظارتیده‌گی برچه دولت اداره‌لریگه مراجعت قیلگنیمیزده هم، اهالیگه ج.وابا بو مسأله بیز‌نینگ امکانیتیمیزدن تشقریده، دېییشدی».
اوشبو شهرچه یشاوچیسی قۉشیمچه قیله‌دی: «طالبان عدلیه وزیری آدملرنی تهدید قیلیب، حقارت قیلگن و امکان قدَر تېزراق فورملرنی تۉلدیریشنی یاکه اویلرینی ترک اېتیشنی اَیتگن».
اونینگ اَیتیشیچه، شهرچه‌نی سقلش و اونگه خدمت کۉرسه‌تیش مسؤولیتی هم طالبان عدلیه وزیریگه علاقه‌دار شخصلرگه تاپشیریلگن. اهالی بوندن آلدین خدمت کۉرسه‌تیش و سقلش خرجتلری اوچون هر آی بیر مینگ و ۲۰۰ افغانی تۉله‌گن بۉلسه، حاضر طالبان هر بیر خانداندن آییگه ایکی مینگ افغانی اوندیرماقده.
شهرچه‌‌نینگ ینه بیر یشاوچیسی شونده‌ی دېیدی: «آدملر ایکی مینگ افغانی تۉله‌شگه امکانیتلری یۉقلیگینی اَیتیشگنیده، طالبان عدلیه وزیرلیگی اولرنی چقیریب: «سیزلر کیمسیزلرکی، پول تۉله‌مه‌یپسیزلر؟ بو شرطنامه مېنینگ چوکیم اوستیده توزیلگن»، دېدی».
شهرچه اهالیسی طالبان محکمه‌سی‌نینگ قرارینی اوشبو گروه عدلیه وزیریگه تقدیم اېتیب، اوندن محکمه قراری مضمونیگه رعایه قیلیشنی سۉره‌گنینی اَیتماقده. اولر‌نینگ سۉزلریگه کۉره، محکمه قراریده شهرچه یېریگه عاید قرار چیقریلگنی، اهالیگه تېگیشلی اوی‌لرگه اېسه تعلقلی اېمسلیگی انیق کۉرسه‌تیلگن. بیراق طالبان عدلیه وزیری بونگه جوابا: «محکمه بونده‌ی دېگن بۉلسه، ناتۉغری قیلیبدی»، دېگن. اهالی‌نینگ بیلدیریشیچه، عمر گلستان شهرچه‌سیده قریب ۷۰۰ ته خاندان و سکّیزته کۉپ قبتلی بنا موجود.
طالبان‌نینگ «مرکزی منطقه‌ده یېرلرنی باسیب آلیش‌نینگ آلدینی آلیش و دولت یېرلرینی قَیتریش بۉییچه مخصوص محکمه‌سی» ۱۰۰/۵۱ مورخ ۱۸ صفر ۱۴۴۸ هـ.ق، سانلی خط بیلن اوشبو گروه‌نینگ یېرلرنی باسیب آلیش‌نینگ آلدینی آلیش کمیسیونیگه مراجعت قیلگن. اونده کابل‌نینگ توقیزینچی ناحیه‌سیده‌گی عمر گلستان شهرچه‌سی اهالیسی عریضه‌سیگه جوابا قوییده‌گیلر قید اېتیلگن: «[طالبان] محکمه‌سی‌نینگ قراری یېر‌نینگ اۉزیگه (یېر میدانیگه) تعلقلی بۉلیب، اونده قوریلگن بنالرگه تعلقلی اېمس».
طالبان‌نینگ اوشبو محکمه‌سی یېرلرنی ناقانونی اېگه‌للش‌نینگ آلدینی آلیش تۉغریسیده‌گی قانون‌نینگ ۹، ۱۱ و ۱۵-مادّه‌لریگه اساسلنیب، یېر قیمتینی تۉله‌ش یاکه اجاره شرطنامه‌سی توزیش، یېرنی بېلگیلنگن نرخ عوضیگه تاپشیریش همده وکالتلی اداره‌لر‌نینگ بنالرنی سقلب قالیش یاکه بوزیش مسأله‌سیده بیرگه‌لیکده قرار قبول قیلیشینی کۉریب چیقیشنی تکلیف قیلگن. شونینگدېک، شهرچه اهالیسی معماسینی حل قیلیش اوچون قانونی ترتیبده ایش کۉریش و ضرور چاره‌لرنی کۉریشنی سۉره‌گن.
عمر گاستان شهرچه‌سی اهالیسی طالبان عدلیه وزیری‌نینگ دعواسینی رد اېتیش مقصدیده سابق حکومتگه تېگیشلی بیر قطار شرعی، رۉیخطگه آلیش حجتلری و رسمی یازیشمه‌لرنی تقدیم اېتگن. اوشبو حجتلرگه کۉره، بحثلی یېر کابل‌نینگ بی‌بی مَهرو، اوچینچی مکروریان حدودیده، گلمیر خان اۉغلی محمد عمر خان نامیگه رۉیخطگه آلینگن. ۱۳۲۱-ییل ۳-حوت سنه‌سیده‌گی ۲۰/۶۱۱۴-سانلی شرعی ملک حجتی اوشبو یېرگه اېگه‌لیک حقوقینی تصدیقلاوچی اساسی حجتلردن بیری صفتیده کۉرسه‌تیلگن.
شونینگدېک، ۱۳۵۹-ییل ۳۰-سنبله سنه‌سیده‌گی ۱۶۳/۱۶۲-سانلی رسمی حجت، یېرلرنی قَیته رۉیخطگه آلیش و انیقلشتیریش شکللری، یېر‌نینگ خصوصیتلری کۉرسه‌تیلگن جدول همده کدستر خریطه‌لری اوشبو ایش بۉییچه تقدیم اېتیلگن باشقه حجتلردیر.
کابل بلدیه‌سی‌نینگ ۷-سانلی یېرلرنی انیقلشتیریش گروهی هیاتی تامانیدن ۱۳۹۰-ییل ۲۳-میزان سنه‌سیده چیقریلگن خطده محمد عمرخان نامیگه رۉیخطگه آلینگن یېر‌نینگ جمعی ۲۵ جریبی دولت احتیاجی اوچون اۉزلشتیریلگنی، ۱۰،۴۵ جریب اوچینچی درجه‌لی یېر اېسه بیرینچی درجه‌لی حسابده ۱۳،۶۸ جریبگه تېنگ بۉلیب، ۲۱۹ و ۲۲۴/۱-نمره‌لرده بېلگیلب قۉییلگنی قید اېتیلگن. شو خطده ینه قریب آلتی جېریب یېر تۉرتینچی مکروریان تورر جای بنالری قوریلگن حدودگه تېگیشلی اېکنی کۉرسه‌تیلگن.
۱۳۹۱-ییل ۷-حمل سنه‌سیده‌گی ۲۷۵/۸۴-سانلی باشقه بیر خطده اۉشه پیتده‌گی شهرسازلیک وزیرلیگی کابل بلدیه‌سیدن رسمی حجتلر و معلوماتلرگه مراجعت قیلگن حالده، بحثلی یېر‌نینگ دولت احتیاجی اوچون اۉزلشتیریلگن یاکه اۉزلشتیریلمه‌گنلیگی بۉییچه یکونی حالتنی تېکشیریشنی سۉره‌گن.
باشقه تاماندن، شهرسازلیک وزیرلیگی ۱۳۹۳-ییلده، ۲۱-جوزا سنه‌سیده‌گی ۲۳۰-سانلی خط آرقه‌لی تخنیکی کمیته و مرکزی کمیسیون تېکشیروویدن سۉنگ گلستان لایحه‌سی خریطه‌لرینی تصدیقله‌گن. اوشبو خطده ۷۰ مینگ ۶۴۳ افغانی مقداریده‌گی سالیق و دولت خدمتلری اوچون تۉلاو عملگه آشیریلگنی هم قید اېتیلگن.
۸سابه گزېته‌سی اختیاریگه کېلیب توشگن ینه بیر خطده اَیتیلیشیچه، شهرسازلیک وزیرلیگی مرکزی کمیسیونی‌نینگ ۱۳۹۳-ییل ۱۲-جوزا سنه‌سیده‌گی بیاننامسیده گلستان لایحه‌سی‌نینگ ۱۳ قبتلی تورر جای و سودا بنالری چیزمه‌لری تخنیکی تېکشیروولردن سۉنگ تصدیقلنگن همده بنالر تصدیقلنگن لایحه‌لرگه موافق قوریلیشی کېره‌کلیگی تأکیدلنگن.
شونینگدېک، ۱۳۹۲-ییلده شهرسازلیک وزیرلیگی و محمد عمرخان اۉغلی مهندس احمدشاه اۉرته‌سیده تورر جای و سودا بنالرینی قوریش بۉییچه توزیلگن کېلیشوو همده وزیرلیک‌نینگ لایحه‌ده‌گی ایکّی فایزلیک اولوشینی بېلگیلش اوشبو ایشگه عاید حجتلرده قید اېتیلگن باشقه مسأله‌لردن دیر.
تقدیم اېتیلگن باشقه حجتلردن بیریده اَیتیلیشیچه، عریضه بېرووچیلردن بیری اوشبو یېر‌نینگ میراث ملکی اېکنینی دعوا قیلیب، سابق افغانستان حکومتیدن اونگه سرمایه کیریتیش و قوریلیش ایشلرینی عملگه آشیریش اوچون شرایط یره‌تیب بېریشنی سۉره‌گن. اوشبو مراجعتدن سۉنگ، اۉشه پیتده‌گی جمهور رییس اۉرین‌باسری مارشال محمد قسیم فهیم ۱۳۹۱-ییل ۲۷-دلو رسمی تاپشیریق چیقریب، شهرسازلیک وزیرلیگیگه مراجعتچی‌نینگ شرعی ملک حجتلری، شهرسازلیک رېجه‌سی و حکومت‌نینگ خصوصی سرمایه‌لرنی قۉللب-قوّتلش سیاستینی انابتگه آلگن حالده، مسأله‌نی قانونی ترتیبده کۉریب چیقیشنی بویورگن اېدی.
بوندن اوّل طالبان عدلیه وزیری امید سبز شهرچه‌سی اهالیسیگه هم اویلرینی بۉشه‌تیش یاکه اوشبو گروهگه هر بیر خانه اوچون آییگه تۉرت مینگ افغانی اجاره حقی تۉله‌شنی بویورگن اېدی. حاضرده اوشبو شهرچه اهالیسی طالبان عدلیه وزیرلیگی‌نینگ باسیمی، تاولمچیلیک و پول اوندیریش حالتلریدن جدّی خواطر بیلدیرماقده.
