طالباننینگ تاووق گۉشتی ایشلب چیقریشده اۉزینی اۉزی تأمینلش حقیدهگی دعواسی؛ نرخلر همان اهالی اوچون یوقاری
آدرینا بهزاد
طالبان افغانستاننی تاووق گۉشتی ایشلب چیقریشده اۉزینی اۉزی تأمینلهیاتگنینی دعوا قیلهیاتگن بیر پیتده، اهالی بازارده اوشبو آزیق-آوقت محصولاتی نرخینینگ آشگنیدن شکایت قیلماقده. اولر طالباننینگ اقتصادی ترقیات بارهسیدهگی سیاستی و دعوالری حاضرگچه خلق دسترخوانیده سېزیلرلی اۉزگریش یرهتمهگنینی و کۉپراق شعار همده ترغیبات خصوصیتیگه اېگه بۉلگنینی اَیتیشماقده. اولر پرندهچیلیک فارملرینینگ کۉپهییشی، تاووق گۉشتی نرخیگه تأثیر قیلووچی عامللر و مملکت بازارلریده اونینگ نرخی یوقاریلیگیچه قالهیاتگنینینگ سببلرینی اۉرگنیشنی طلب قیلماقده. عینی پیتده، اَیریم ساتووچیلر طالبان مسووللرینینگ افغانستان تاووق گۉشتی و تخم ایشلب چیقریشده اۉزینی اۉزی تأمینلهیاتگنی حقیدهگی دعواسی بازار حقیقتیگه ماس کېلمسلیگینی اَیتماقده.
کابل اهالیسیدن بیری حکمت (مستعار)، طالبان وقتی-وقتی بیلن افغانستان تاووق گۉشتی ایشلب چیقریشده اۉزینی اۉزی تأمینلش درجهسیگه یېتگنی و اېندی اونی چېتدن آلیب کیریشگه احتیاج یۉقلیگینی اعلان قیلیشینی اَیتهدی. بیراق اونینگ سۉزلریگه کۉره، آدملر تاووق گۉشتی ساتیب آلیش اوچون قصاب دوکانلریگه مراجعت قیلگنیده، اونی ارزان نرخده تاپه آلمهیدی.
بو کابل اهالیسی قۉشیمچه قیلهدی: «اگر بو اۉزینی اۉزی تأمینلش گۉشت نرخیگه ایجابی تأثیر کۉرسهته آلمسه، بوندن نیمه فایده؟ خلق اوچون مهم نرسه محصولاتنی بازاردن ارزان نرخده و اقتصادی امکانیتی همده درآمدیگه ماس روشده ساتیب آلیشی دیر.» اونینگ اَیتیشیچه، تاووق گۉشتی ایشلب چیقریشده اۉزینی اۉزی تأمینلش حقیدهگی خبر اعلان قیلینیشیدن آلدین آدملر بیر کیلوگرام تاووق گۉشتینی ۲۳۰–۲۴۰ افغانیدن ساتیب آلگن، حاضر اېسه بیر کیلوگرام اوچون ۲۸۰ افغانی تۉلهشلری کېرهک.
حکمت قۉشیمچه قیلهدی: «دېمک، کۉرینیب توریبدی که اقتصادی ترقیات حقیدهگی سیاست و دعوالر خلق دسترخوانیده اۉزگریش یرهتیش اۉرنیگه، کۉپراق اولرنینگ اۉزلری اوچون شعار و ترغیبات خصوصیتیگه اېگه.»
کابل شهرینینگ یېتّینچی حدودی اهالیسی گل احمد هم تاووق گۉشتی و تخم نرخینینگ آشگنیدن شکایت قیلهدی. او شوندهی دېیدی: «ایلگری بیر کیلوگرام تاووق گۉشتی ۱۶۰–۱۸۰ افغانی اېدی، حاضر اېسه ۲۷۰–۲۸۰ افغانیگه یېتدی. بیر پتنوس تخم هم ایلگری ۱۸۰–۲۱۰ افغانی تورردی، حاضر اېسه ۲۹۰–۳۰۰ افغانیگه یېتگن. نرخلر جوده آشیب کېتدی و آدملر چارهسیز قالیشدی.»
کابل شهرینینگ اۉنینچی حدودی اهالیسی فتاح (مستعار)، بازاردهگی تاووق گۉشتینینگ ایشلب چیقریش نرخی بیلن ساتوو نرخی اۉرتهسیدهگی سېزیلرلی فرق بازار حالتی و نرخلرگه تأثیر قیلووچی عامللرنی چوقور اۉرگنیش ضرورتینی ینهده آشیرهیاتگنینی اَیتهدی.
بو کابل اهالیسی وکیلی شوندهی دېیدی: «بازارده تاووق گۉشتی نرخی همان یوقاری و حاضرگچه اونینگ نرخیده سېزیلرلی پسهییش کوزهتیلگنی یۉق. بو حالت، اینیقسه، کم درآمدلی عایلهلر اوچون اقتصادی معمالرنی کېلتیریب چیقرگن و اولرنینگ خواطرلرینی آشیرگن.»
فتاح قۉشیمچه قیلهدی: «طالبان مسووللری پرندهچیلیک فارملرینینگ کۉپهییشی و تاووق گۉشتی نرخینینگ یوقاریلیگیچه قالیش سببلرینی جدّی اۉرگنیشلری همده اونینگ نرخیگه تأثیر قیلووچی عامللر، جملهدن، ایشلب چیقریش خرجتلری، تاووق آزوقهسی نرخی، ایمپورت، ترانسپورت، اولگورجی سودا، واسطهچیلرنینگ رۉلی و بازارده نرخ بېلگیلنیش ترتیبینی بهالشلری کېرهک. شونینگدېک، نرخنی صنعی آشیریش یاکه بازار حالتیدن سوءاستعمال قیلیش حالتلری انیقلنسه، خلق اوچون تاووق گۉشتینی مقبول نرخده یېتکزیب بېریش امکانینی یرهتیش مقصدیده ضرور حقوقی و نظارت چارهلرینی کۉریش لازم.»
عینی پیتده، ساتووچیلردن بیری عابد (مستعار)، طالبان مسووللرینینگ افغانستان تاووق گۉشتی و تخم ایشلب چیقریشده اۉزینی اۉزی تأمینلهیاتگنی حقیدهگی دعواسی بازار حقیقتیگه ماس کېلمسلیگینی اَیتهدی. اونینگ سۉزلریگه کۉره، بعضاً اولر قصاب دوکانیده ساتیش اوچون یېترلی مقدارده تاووق هم تاپه آلمهیدی.
بو ساتووچی قۉشیمچه قیلهدی: «بیر کیلوگرام تاووق گۉشتینینگ نرخی ۲۵۰–۲۸۰ افغانی، بیر پتنوس تخم اېسه ۲۸۰–۳۰۰ افغانیدن ساتیلماقده. ایلگری تاووق گۉشتی و تخم چېتدن آلیب کیریلگن پیتده نرخلر پستراق اېدی و بیز اوچون هم اولرنی مقبول نرخده ساتیب آلیش ممکن بۉلردی. اۉشه پیتده حتا کم درآمدلی عایلهلر هم تاووق گۉشتی ساتیب آله آلردی؛ اما حاضر نرخلر آشگنی سببلی کۉپلب آدملرنینگ اونی ساتیب آلیشگه قُربی یېتمهیدی.»
بو حالت طالبان حاکمیتینینگ بېش ییلدن آرتیق دوریده افغانستانده قشّاقلیک و آچلیک کوچهیگن بیر پیتده یوز بېرماقده. انسان پرورلیک یاردملر همده چېت اېلدهگی افغانستانلیک فقرالرنینگ عایلهلریگه یوبارهیاتگن یاردملری مملکتدهگی ضعیف اقتصادی وضعیتنینگ دوام اېتیشیگه سبب بۉلهیاتگن عامللردن بیری صفتیده تیلگه آلینماقده.
