طالبان هراتلیک بیر یاش ییگیتنی کلتکلگندن سونگ قۉللری باغلنگن حالده آتیب تشلهدی
طالبان بېش ییلدن آرتیق وقت دوامیده کۉپلب آدملرنی عامه کۉز اۉنگیده، قۉللری باغلنگن حالده آتیب تشلهگن. اېنگ سۉنگگی حالتده ۸صبح بیر ویدیوگه اېگه بۉلدی. اونده هرات شهریده ۳۰ یاشلی بیر ییگیت قییناققه سالینیب، کلتکلنگنیدن سۉنگ، قۉللری باغلنگن حالده طالبان تامانیدن آتیب تشلنهیاتگنی کۉرسهتیلگن. اوشبو واقعه قندهی صادر بۉلگنی حقیده انیق تفصیلاتلر موجود اېمس. ییگیتنینگ یقینلری اَیتیشیچه، اگر او طالبان نظریده جنایت صادر اېتگن بۉلسه، اونی چقیرتیریب، اوشبو گروه محکمهلریگه تاپشیریشلری کېرهک اېدی، عامهنینگ کۉز اۉنگیده و قۉللری باغلنگن حالده آتیب تشلشلری اېمس. ییگیتنینگ آنهسی فرزندینینگ ایشی طالباننینگ یوقاری مرتبهلی منصبدارلری تامانیدن کۉریب چیقیلیشینی طلب قیلگن. بوندن اوّل منبعلر جمعه کونی هراتده بیر کیشینینگ طالبان تامانیدن اۉلدیریلگنینی تصدیقلهگن اېدی.
محلی منبعلر بیر کیشینینگ قییناققه سالینیب، قۉللری باغلنگنیدن سۉنگ آتیب تشلنهیاتگنینی کۉرسهتووچی ویدیونی یوباریب، بو ۳۰ یاشلی اېرککنینگ اسمی عبدالقادر پهلوانزاده بۉلگنینی اَیتیشماقده. او اۉتگن هفتهنینگ جمعه کونی ساعت بېشده هرات شهرینینگ تۉرتینچی حدودیده، بیرینچی پُستده، تانک تیل قرشیسیده طالبان قوماندانلریدن بیرینینگ خاتینی سینگلیسینینگ اېری تامانیدن آتیب تشلنگن. ویدیوده هم بیر یاش ییگیت قییناققه سالینیب، قۉللری باغلنگنیدن سۉنگ، بیر شخص تامانیدن اۉققه توتیلهیاتگنی کۉرینهدی.
منبعلر اَیتیشیچه، اوشبو ویدیوده پشتون زرغون تومنیدهگی طالبان خوفسیزلیک قوماندانی سید احمد محمدی، اونینگ اکهسی و خاتینینینگ اکهسی اشتراک اېتگن. منبعلر قۉشیمچه قیلیشیچه، طالبان خوفسیزلیک قوماندانی بو قاتللیکنی شونینگ اوچون عملگه آشیرگن: او بوندن آلدین خاتینینینگ اکهسین اوشبو قاتللیک عوضیگه سینگلیسینی طالبان قوماندانیگه تورموشگه بېریشگه راضی قیلگن.
منبعلر قۉشیمچه قیلیشیچه، ویدیوده نیمچه و قاره کییم کیگن شخص پشتون زرغون تومنیدهگی طالبان پولیس قوماندانی؛ عبدالقادرنی میلتیق قۉنداغی بیلن اورهیاتگن شخص طالبان خوفسیزلیک قوماندانینینگ اکهسی، اونگه قرهته اۉق اوزهیاتگن شخص اېسه طالبان پولیس قوماندانینینگ خاتینینینگ اکهسی حسابلنهدی. منبعلرگه کۉره، عبدالقادر اۉز موتورسایکلیده یاقیلغی قوییش تانک تیلگه بارگن و اۉشه یېرده بو شخصلرنینگ قۉلیگه توشگن.
منبعلر تأکیدلشیچه، بو آنهنینگ آوازی هېچ قهیېرگه یېتیب بارمهگن و طالبان اونی اوشبو ایشنی تعقیب قیلیشدن قۉرقیتگن.
منبعلرگه کۉره، عبدالقادر پهلوانزاده هرات شهریده جوشکارلیک بیلن شغللنگن و هېچ قندهی گروه یاکه آقیمگه علاقهدار بۉلمهگن. پهلوانزاده عایلهسی اونینگ حربی تجربهسی هم بۉلمهگنینی و بوندن اوّل هېچ قچان طالبان تامانیدن قۉلگه آلینمهگنینی تأکیدلهیدی. اولر طالبان بو ایش بۉییچه جواب بېریش و اونی کۉریب چیقیشگه تیّار اېمسلیگینی اَیتیشماقده.
حاضرگچه طالبان تامانیدن اۉلدیریلگن شخصگه قرشی هېچ قندهی عیبلاو ایلگری سوریلمهگن و بو گروه فقط اونینگ عایلهسیگه، اینیقسه آنهسیگه، اوشبو واقعهنی تعقیب قیلیشدن واز کېچیشی اوچون باسیم اۉتکزگن.
بوندن اوّل هم پنجشیر، اندراب و بدخشاندن ویدیولر ترقهلگن بۉلیب، اولرده طالبان آدملرنی قۉللری باغلنگن حالده آتیب تشلهگنی کۉرسهتیلگن. اوشبو گروه، شونینگدېک، اۉنلب کیشیلرنی طالبانگه قرشی جبههلرگه اعضالیکده عیبلب، قۉللری باغلنگن حالده آتیب تشلهگن.
بیرلشگن ملتلر تشکیلاتینینگ افغانستاندهگی یاردم هیاتی (یوناما) بوندن اوّل بیر قطار حساباتلریده طالباننینگ محکمهدن تشقری قاتللیکلری و دله محکمهلرینی حجتلشتیرگن. یونامانینگ ۲۰۲۳-ییل اگوست آییده اعلان قیلینگن حساباتلریدن بیریده قید اېتیلیشیچه، اوشبو گروه ۲۰۲۱-ییل اگوستیدن ۲۰۲۳-ییل جونیگچه کمیده ۲۱۸ نفر سابق خوفسیزلیک کوچلری و حکومت اعضالرینی اۉلدیرگن. شونینگدېک، ۱۴ ته مجبوری یۉقالیش، ۴۲۴ دن آرتیق اۉزباشیمچهلیک بیلن حبسگه آلیش و اوشلب توریش همده ۱۴۴ دن آرتیق قییناق و یامان معامله حالتلری قید اېتیلگن.
