افغانستان دهقانلرینی قۉللب-قوّتلش اوچون بېش میلیون یورولیک لایحه
۸صبح، کابل: اروپا اتفاقی و بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی (FAO) افغانستانده دهقانلر و اولرنینگ بیزنسلرینی قۉللب-قوّتلش اوچون بېش میلیون یورولیک لایحهنی عملگه آشیریش باشلنگنینی معلوم قیلدی.
بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی یکشنبه کونی، ۲۲- سنبله، معلوم قیلیشیچه، اوشبو لایحه بازارلرگه ایریشیش امکانیتلرینی آشیریش، برقرار درآمد منبعلرینی یرهتیش همده اقلیم و اقتصادی انقراضلرگه قرشی کورهشیش صلاحیتینی کوچهیتیریش مقصدیده عملگه آشیریلهدی.
اوشبو لایحه آزیق-آوقت خوفسیزلیگی و اقلیم خوفلریدن ضرر کۉرگن حدودلردهگی ضعیف عایلهلرنی، جملهدن، قَیتیب کېلگنلر، ایچکی کۉچیریلگنلر و مېزبان جماعهلرنی قۉللب-قوّتلهیدی.
لایحه دایرهسیده ایکّی مینگ هکتار میداندهگی ویران بۉلگن اۉرمانلر و ییلاولر قَیته تیکلنهدی همده عیاللر و محلی جماعهلر تامانیدن باشقریلهدیگن ۲۵۰ ته کۉچتخانهگه یاردم کۉرسهتیلهدی.
بیرلشگن ملتلر تشکیلاتینینگ آزیق-آوقت و اېکینچیلیک تشکیلاتی اېکینچیلیک کمپنیلریگه مالیوی یاردم و تخنیکی مصلحتلر بېریش بیلن بیر قطارده، اولرنینگ فعالیتینی کېنگهیتیریش، محلی ایشلب چیقرووچیلردن محصولاتلرنی خرید قیلیش و قیشلاق حدودلریده ایش اۉرینلرینی یرهتیش اوچون شرایط یرهتهدی.
