بدخشان ولایت شفاخانهسی؛ بېمارلر دارو-درمان و طبی جهازلر یېتیشمسلیگی همده شفاکارلرنینگ اعتبارسیزلیگیدن شکایت قیلماقده
بابک فرامرز
بدخشان ولایت شفاخانهسیگه مراجعت قیلهیاتگن اَیریم بېمارلر اوشبو شفاخانهدهگی طبی خدمتلر صفتینینگ پستلیگی، دارو-درمان و طبی جهازلرنینگ یېتیشمسلیگی همده شفاکارلر و نرسلرنینگ اعتبارسیزلیگیدن شکایت قیلماقده. اولر بدخشاننینگ اوزاق و یقین تومنلریدن بېمارلر مراجعت قیلیشیگه قرهمهی، اوشبو شفاخانهنینگ امکانیتلری و خدمتلری بېمارلرنینگ احتیاجلرینی قاندیره آلمهیاتگنینی اَیتیشماقده.
ساغلیق معمالرینی حل قیلیش اوچون ولایت شفاخانهسیگه مراجعت قیلهیاتگن بدخشاننینگ بیر قطار اهالیسی امکانیتلر و دارو-درمانلرنینگ یېتیشمسلیگی، بېمارلرنینگ کۉپلیگی همده اولر شفاکارلر و نرسلرنینگ اعتبارسیزلیگی دېب اتهیاتگن حالت دوالنیش جریانینی قیینلشتیرگنینی اَیتیشماقده. اَیریملری اقتصادی معمالرگه قرهمهی، بېمارلری اوچون ضرور دارو-درمان و واسطهلرنی شفاخانه تشقریسیدهگی داروخانهلر همده خصوصی داروخانهلردن ساتیب آلیشگه مجبور اېکنینی اَیتماقده.
راغستان تومنی اهالیسی، مختار احمد (مستعار) خاتینینی دوالهتیش اوچون ولایت شفاخانهسیگه مراجعت قیلگن. او خاتینی ایکّی کوندن بېری اوشبو شفاخانهنینگ تۉغروق بۉلیمیده یاتگنینی، بیراق اونینگ سۉزلریگه کۉره، شفاکارلر و نرسلر اونگه یېترلیچه اعتبار بېرمهیاتگنینی اَیتهدی.
بو اېرکک شوندهی دېیدی: «ایکّی کوندن بېری خاتینیم تۉغروق بۉلیمیده یاتیبدی، اما هېچ کیم اونگه اعتبار بېرمهیپتی. دارو-درمان و برچه کېرهکلی نرسهلرنی شفاخانه تشقریسیدهگی داروخانهلردن ساتیب آلیب کېلهمن. نرسلر اۉزلری تنیگن یاکه توغروق وقتیده اولرگه «چایپولی» صفتیده پول بېرهدیگن بېمارلرگه کۉپراق اعتبار بېریشهدی، اما کمبغل بېمارلرگه اعتبار بېریشمهیدی.»
مختار احمدنینگ اَیتیشیچه، یاتقیزیلگن بېمارلر خانهلرینینگ حالتی یخشی اېمس و بیر خانهده بیر نېچه ته بېمار سقلنهدی. او اَیریم حاللرده ایکّی بېمار بیر وقتنینگ اۉزیده بیرته تختگه یاتقیزیلیشینی دعوا قیلهدی.
اوشبو شفاخانهدهگی بېمارلردن ینه بیرینینگ همراهی محمدصادق (مستعار)، اکهسی بهارک–فیضآباد یۉلیده صادر بۉلگن یۉل-ترانسپورت حادثهسیده جراحتلنگنینی و ایکّی کوندن بېری ولایت شفاخانهسیده یاتگنینی اَیتهدی. او هم طبی خدمتلر صفتینینگ پستلیگی همده شفاکارلر و نرسلرنینگ اعتبارسیزلیگی دېب اتهیاتگن حالتدن شکایت قیلهدی.
بو اېرکک شوندهی دېیدی: «اکهمنی شاشیلینچ بۉلیمگه آلیب باریشگنیده، احوالی آغیر بۉلگنی سببلی شفاکارلر اونگه تېزراق یاردم کۉرسهتهدی، دېب اۉیلهگندیم؛ اما بیر نېچه دقیقهدن سۉنگ، بیر نرسدن باشقه هېچ کیم اونگه اعتبار بېرمهیاتگنینی انگلهدیم.»
محمد صادق، شونینگدېک، اوشبو شفاخانهنینگ قان بانکیده یېترلی قان موجود اېمسلیگینی و قانگه احتیاجی بۉلگن بېمارلر اونی شفاخانه تشقریسیدن تاپیشگه مجبور بۉلهیاتگنینی دعوا قیلهدی. اونینگ اَیتیشیچه، اَیریم عایلهلر قان تاپیش اوچون عایله اعضالری یاکه قرینداشلریدن یاردم آلهدی یاکه اجتماعی ترماقلرده قان ایزلش بۉییچه چقیریقلر اعلان قیلهدی.
بدهخشان ولایت شفاخانهسی شفاکارلریدن بیری، اسمی حساباتده کېلتیریلیشینی ایستهمهگن حالده، اوشبو شفاخانهدهگی طبی خدمتلر حالتینی بیر ییل اوّلگیگه قرهگنده یامانراق دېب بهالهیدی. اونینگ اَیتیشیچه، بو حالت شفاخانهنی باشقهریش شرطنامهسی «SDO» سنایی ترقیات تشکیلاتیگه تاپشیریلگنیدن کېین یوزهگه کېلگن.
اوشبو شفاکارنینگ اَیتیشیچه، مذکور تشکیلات طبیات خادملرینی ایشگه قبول قیلیشده جدّی و قانونی جریانلرگه رعایه قیلمهیدی، شونینگدېک، طبی خدمتلرنی کۉرسهتیشده هم خدمتلر صفتیگه یېترلیچه اعتبار بېرمهیدی.
بو شفاکار شوندهی دېیدی: «۲۰۰۹-ییلدن قریب بیر ییل اوّلگچه ولایت شفاخانهسینینگ شرطنامهسی آغهخان ادارهسیده اېدی، اما بیر ییلدن کمراق وقت بۉلدی، طالبان بو شرطنامهنی سدا ادارهسیگه یاکه سنایی ترقیات تشکیلاتیگه بېرگن. بو ادارهده نه ساغلام باشقروو بار، نه طبی خدمتلر صفتیگه اعتبار بېریلهدی.»
بوندن آلدین هم بدخشاندهگی طبی خدمتلر حالتی حقیده بیر نېچه بار شکایتلر و خواطرلر بیلدیریلگن. بدخشاننینگ اَیریم اهالیسی هم اجتماعی ترماقلرده اوشبو ولایتده طبی خدمتلر قندهی کۉرسهتیلهیاتگنیدن خواطر بیلدیرگن.
